Ciudadanos, Foro y PP desmárquense de la propuesta de Pueblu de dar el nome d’Enriqueta González Rubín a la Casa Cultura de Ribeseya

“De seis opiniones, les trés de la política nun tán a favor y les trés del mundu de la cultura tán mui a favor”, resume Ricardo Pedro Cangas, conceyal de Pueblu, la situación na que ta la propuesta pa que la Casa Cultura de Ribeseya lleve’l nome d’Enriqueta González Rubín. La de Santianes del Agua ye l’autora de la primer novela n’asturianu, ‘Viaxe del Tíu Pacho el Sordu a Uviedo’.

Pueblu rexistró nel Conceyu un encamientu pa “que s’empecipien los trámites oportunos pa que coincidiendo col aniversariu del so nacimientu se renome la Casa de Cultura de Ribeseya como Casa de Cultura Enriqueta González Rubín”. Una propuesta que, hasta’l momentu, namái tuvo apoyu del mundu de la cultura llocal y nacional, a la espera de la posición qu’adopte l’alcalde, el socialista Ramón Manuel Canal –gobierna en minoría col sofitu del edil de Ciudadanos, Luis Fuentes– que prometiera en branu del 2019 una cai pa l’autora tres unes xornaes que-y dedicó l’Asociación Cultural Amigos de Ribadesella.

El representante del partíu naranxa argumentó tar en contra de dar el nome de persones a edificios públicos, mesma postura amosada por Foro, que sí reconoz la importancia de la figura de González Rubín. El PP ye’l que caltién la posición más sorprendente, al entender que la sienda y la placa que tien la escritora en Santianes ye suficiente, ensin dar valor nengún a esta figura clave de les lletres asturianes.

Tolo contario asocede nel mundu de la cultura. L’Asociación Cultural Amigos de Ribadesella, el cronista oficial de Ribeseya Lorenzo Cordero y Iniciativa pol Asturianu sofiten la propuesta de Pueblu.

“Nun hai nenguna dulda de qu’Enriqueta González Rubín ye la meyor y más importante escritora del sieglu XIX, amás d’una muyer adelantada al so tiempu, madre soltera y defensora de postures contraries a la violencia machista”, apunta Cangas. “Inaciu Galán, presidente d’Iniciativa pol Asturianu, facía güei una analoxía perbona: ye como si Alcalá de Henares arrenegará de Cervantes”, añade’l voceru de la candidatura de xunidá popular, que pretende nel Plenu de mañana sacar l’asuntu en ‘Ruegos y entrugues’.

Homenaxe a les escritores n’asturianu

Iniciativa pol Asturianu asoleyó güei un comunicáu p’amosar públicamente’l sofitu a la propuesta de Pueblu. "La Casa de Cultura nun tien un nome propiu nesti momentu, polo que sobrepone-y el nome d’Enriqueta González Rubín ye un xestu d’alcordanza cola escritora, la primer novelista en llingua asturiana”, señala.

“Esta proposición ye un homenaxe a la propia escritora ribeseyana, pero tamién a les Lletres Asturianes y a les muyeres escritores n’asturianu”, asegura la organización, que recuerda que González Rubín “ye un símbolu non sólo de Santianes, sinón una referencia de too Ribeseya y de la lliteratura asturiana, asina como un recursu turísticu que tien d'aprovechase”.

Na imaxe, la Casa de Cultura de Ribeseya. Semeya propiedá del Comité Organizador del Descenso Internacional del Sella.