El ‘Calendariu Científicu Escolar 2021’ del CSIC yá ta disponible pa la so descarga n’asturianu y otres cinco llingües

Al asturianu, castellanu, gallegu, eusquera y catalán, el ‘Calendariu Científicu Escolar’ suma esti añu l’inglés pa esti proyeutu educativu pa escolines y escolinos de Primaria y Secundaria. El Conseyu Superior d’Investigaciones Científiques (CSIC) yá tien disponible pa la so descarga de baldre la edición del 2021, que recueye un aniversariu al rodiu la investigación pa cada día del añu.

L’Academia de la Llingua Asturiana (ALLA) fixo la torna d'esti proyeutu del Institutu de Ganadería de Monte, centro mestu del CSIC y la Universidá de Llión, a partir d’una propuesta d’Europa Laica que tien l’oxetivu de divulgar la cultura científica nes escueles y promover vocaciones ente los alumnos na ciencia, la teunoloxía, la inxeniería y les matemátiques. “Pa ello aseguramos la visibilidá de las muyeres científices y teunólogues, siguiendo’l principiu de paridá na esbilla de les efemérides”, esplica Pablo Gutiérrez Toral, investigador del CSIC natural de Blimea y coordinador del calendariu, qu’añade que “también intentamos dar proyeición a persones y afayos contemporáneos y de campos d’investigación lo más variaos posible, como la biomedicina, l’astronomía, la química, la agricultura, la música, el folclor, les ciencies del mar o la filoloxía”.

Asina, cada día del añu los escolinos van poder conocer un avance científicu o el nacimientu d’un investigadora, como ye’l casu de güei, nel 1907, de la inmunóloga estauxunidense Mary Shaw Shorb: “Mary desendolcó una téunica p’analizar la vitamina B12. Con ello contribuyó a combatir l’anemia perniciosa”, esplica. Amás, van poder trabayar con una guía didáutica con actividaes que pueden ser adaptaes a distintos rangos d’edá y materies, mentes que los adultos tamién van poder conocer toles efemérides diaries al traviés de la cuenta en Twitter del proyeutu.

La otra novedá d’esta segunda edición del calendariu, amás de la incorporación del inglés, l’usu de toles llingües pa nomar los meses y incorporar la estaya ‘Eventu del mes’, ye l’enfotu puestu na accesibilidá d’esta ferramienta y por esti motivu, ente otres coses, “facilítase tamién en testu planu, lo que permite la so receición per aciu sintetizadores de voz, llectores de pantalla o llinies Braille”, apunta Gutiérrez Toral. L’investigador asturianu cuenta con repetir l’esitu del añu pasáu, “cuando superamos les 7.000 descargues nes primeres 24 hores y les 50.000 nes dos selmanes primeres”, a lo qu’hai que sumar les 3.500 ediciones que s’imprimen pa facelos llegar a los centros educativos.

Xunto cola ALLA, esti añu participen nel proyeutu, amás de los entamadores, la Fundación Española para la Ciencia y la Tecnología (FECYT) –adscrita al Ministeriu de Ciencia y Innovación–, la Kultura Zientifikoko Katedra de la Euskal Herriko Unibertsitatea y la Euskal Unibertsitate Sistemaren Kalitate Agentzia, la Unidade de Divulgación Científica e Cultural de la Universidade da Coruña, Europa Laica, la University of California en Davis y la Representación Illes Balears del CSIC. A estos organismos hai que sumar la collaboración d’otros ocho coleutivos.