El CSIC edita un calendariu escolar científicu en cinco llingües, ente elles l'asturianu

Siguiendo exemplos esistentes n’Alba o Rumanía, y a propuesta d’Europa Laica, el Conseyu Superior d’Investigaciones Científiques (CSIC) ta acabante d’asoleyar un calendariu escolar científicu correspondiente al 2020 en toles llingües cooficiales y n’asturianu. L’Academia de la Llingua Asturiana (ALLA) participó como entidá financiadora de la iniciativa del Institutu de Ganadería de Monte.

Esti centru mestu del CSIC y la Universidá de Lleón contó pa la ellaboración del ‘Calendariu Científicu Escolar 2020’ col sofitu d’un ampliu númberu de profesionales de la educación y otres persones voluntaries que, tres una invitación pública a la participación, buscaron y propuxeron aniversarios. Asina, les neñes y neños de Primaria y Secundaria, a los que va dirixíu esti calendariu, van poder consultar les efemérides científiques de caún de los 366 díes colos que va contar esti 2020, una ferramienta que va tar acompañada d’una guía didáutica con actividaes que pueden ser adaptaes a distintos rangos d’edá y materies.

“Fiximos un esfuerciu por dar a conocer persones y afayos del presente col oxetivu d’averar la cultura científica a la población más mozo”, esplica Pablo Gutiérrez Torral, coordinador del proyeutu nacíu a iniciativa d’Europa Laica, que punxo enfotu “nel usu d’un llinguaxe non sexista y n’asegurar la visibilidá de les muyeres científiques y teunólogues pa poner a disposición del alumnáu referentes que promuevan les vocaciones científico-téuniques ente les neñes y adolescentes”. Disponible pa la so descarga dixital n’asturianu, castellanu, gallegu, eusquera y catalán, tamién s’imprentaron 3.500 exemplares pa la so difusión en centros educativos.

El proyeutu contó con financiación de delles entidaes, como l’ALLA, la Fundación Española para la Ciencia y la Tecnología (FECYT) –adscrita al Ministeriu de Ciencia, Universidaes y Innovación–, la Kultura Zientifikoko Katedra de la Euskal Herriko Unibertsitatea, UNIBASQ, la Unidade de Divulgación Científica e Cultural de la Universidade da Coruña, la Fundación Ferrer i Guàrdia y Europa Laica, asina como otres instituciones collaboradores.