Asturies rexistra per segunda xornada 91 contaxos y una tasa de positividá del 3,6

La Conseyería de Salú camuda la forma de comunicar los datos oficiales de la COVID-19.

Les cifres de la pandemia d'esti xueves son práuticamente idénticos a los del miércoles. Per segunda xornada detéctense 91 contaxos, mentes que la tasa de positividá ayeri foi del 3,60 por cientru tres la realización de 3.448 pruebes de diagnósticu d'infeición activa, cuando'l día anterior quedó nun 3,64 por cientu al facer 3.322 tests.

Hai que llamentar na xornada 8 muertes: siete homes de 88, 87, 86, 83, 82, 82 y 63 años, y una muyer de 92, de los qu'ún vivía en residencia. Dende qu'entamó l'andanciu finaron cola enfermedá causada pol coronavirus SARS-CoV-2 1.278 persones, tres l'actualización de datos pola Conseyería de Salú.

Éstos llevaban paralizaos dende'l vienres pasáu. Ayeri comunicaba que nun espublizaría más el cuadru habitual coles informaciones que comunicaba dende la primer fola, primero diariamente y llueu de llunes a vienres, coles cifres oficiales, y anunciaba una ferramienta nueva pa consultalo na web creada sobre la COVID-19.

Hai hospitalizaes 370 persones con confirmación o sospecha de COVID-19, a los qu'hai que sumar les 81 que tán na UCI. Son 39 y 2 menos que'l miércoles, de manera respeutiva.

La incidencia acumulada nos 7 díes últimos n'Asturies ye de 85,84 casos por 100.000 habitantes, cuando la media estatal s'asitia en 118,97.

33 biltos activos

Asturies informó al Ministeriu de Sanidá de la esistencia de 33 biltos activos, 3 menos qu'hai una selmana, que sumen un total de 869 casos. 6 d'ellos detectáronse estos 7 díes últimos, comunica Salú.