L'Uviéu va enfrentase al Málaga CF en La Rosaleda na eliminatoria de Copa

El Sporting va tener que desplazase a Euskadi pa xugar col Amorebieta, líder del so subgrupu de Segunda B. Llanera y CD Lealtad quedaron eliminaos pol Celta y l'Alcorcón.

Nun tuvo suerte l'Uviéu nel sortéu de la segunda ronda de Copa, yá que va tener que percorrer la Península pa vese les cares con ún equipu difícil de superar, el Málaga CF de Sergio Pellicer, col que los azules tan empataos a puntos na tabla. Los andaluces superaron el miércoles a un Segunda División B, el Coruxo, por 0-4, mentes que los de Ziganda facía lo propio'l martes con un Tercera, el CD Coria, por 2-3.

Más benévolu foi pal Sporting, que va enfrentase a un equipu de Segunda B tres eliminar el miércoles a un Tercera, el Quintanar del Rey (1-2). Sicasí, l'Amorebieta nun va ser un rival fácil, yá que lidera el subgrupu 2A con 16 puntos, dos más que l'Alavés B, que cuenta con un partíu menos.

Los d'Amorebieta-Etxano xueguen n'Urritxe, campu municipal de prau natural con aforu pa 3.000 espectadores, y vienen de dexar fuera a la UD Logroñés gracies a un gol de Mikel Álvaro. El partíu col equipu de La Rioja celebróse ensin públicu por cuenta les restricciones impuestes pol Gobiernu vascu pa controlar l'espardimientu del coronavirus SARS-CoV-2 y ye posible que contra'l Sporting se repita la situación.

La segunda ronda de la Copa va celebrase la selmana del 6 de xineru, a partíu únicu.

Ensin opciones

Los otros dos equipos asturianos na primer ronda nun pudieron sacar alantre les sos eliminatories contra equipos de mayor categoría. Un gol a los 3 minutos de Reko punxo mui pindiu'l partíu al Lealtad del miércoles contra'l recuperáu Alcorcón, que de la mano d'Anquela ye otru equipu.

Sosa anotaría'l segundu pa los madrilanos nel minutu 60 y Álex Blanco marcaría'l del honor pa los maliayos nel 89. L'equipu alfareru acabaría pidiendo la hora, pero l'empate nun llegó.

Más dificultaes atopó'l Llanera col Celta, que nun dio opción nel partíu celebráu nel Carlos Tartiere Nuevu. Un tanto de Lautaro nel 41, depués d'una ocasión nidia de Barredo, que llanzó alto, dio portazu a un partíu qu'acabó con un 0-5 con tantos de Nolito, en dos ocasiones, Emre Mor y Hugo Mallo.

Na semeya, l'árbitru asistente Juan Carlos Yuste Jiménez abre una bola del bombu de los equipos de Segunda.