El Betis, rival del Sporting en dieciseisavos de Copa

Los de Gallego superaron al Amorebieta (0-1) con gol de Cristian Salvador, mentes que l'Uviéu cayó na prórroga col Málaga CF (1-0).

El sortéu de dieciseisavos de Copa celebráu esta mañana nel Salón Luis Aragonés de la Ciudad del Fútbol de Las Rozas empareyó al Sporting col Betis. El partíu va celebrase ún de los siguientes díes a partíu únicu n'El Molinón: 16, 17, 20 o 21 d'esti mes.

El conxuntu andaluz, entrenáu por Manuel Pellegrini, ocupa la undécima posición en Primera División con 20 puntos (6 victories, 2 empates y 9 derrotes), pero ye l'equipu más goliáu de la categoría, con 31 tantos encaxaos, por 20 a favor. Na segunda ronda eliminó al Mutilvera (1-3) y na so plantía hai dos roxiblancos: el xixonés Dani Martín, ensin minutos en competición, y el paraguayu Toni Sanabria, qu'acumula 2 dianes en Lliga.

El Sporting llega a esta eliminatoria al ganar n'Urritxe al Amorebieta nun partíu condicionáu pol mal estáu del prau depués de les numberoses lluvies de los díes últimos en tol norte peninsular. Los roxiblancos nun fixeron un bon partíu, anque nun se vieron superaos en momentu nengún pol rival, en puestos d'ascensu en Segunda B, y finalmente un balón nun corner, que cayó a los pies de Cristian Salvador, desniveló la balanza pa los de Mareo.

Igualdá máxima

Asturies nun pudo colocar a un segundu representante nesta ronda de Copa. L'otru equipu vivu en competición, l'Uviéu, compitió en La Rosaleda nun choque mui igualáu que llevó'l Málaga nel tramu final de la prórroga, cuando too paecía que se diba decidir nos penaltis.

La espulsión de Javi Mier nel 114, tres recibir dos marielles en trés minutos, volcó a los de Pellicer sobre la portería de Femenías. El guardameta balear nun bloquió un disparu dende fuera del área d'Alexander, quedando'l balón muertu nel área pa que Chavarría marcara a placer nel minutu 118, yá ensin tiempu a reaición.

Na semeya, Álex Talavera, presidente del Cornellà, que sacó la bola del Sporting.