Salú informa de 229 positivos esti xueves

La tasa de positividá asítiase nun 5,44 y rexístrense 18 muertes per segundu día.

La Conseyería de Salú informó ayeri de la detección de 229 contaxos. Son 7 más que'l miércoles.

Na xornada fixéronse 5.537 pruebes PCR, polo que tasa de positivá foi del 5,44 por cientu, inferior a la del día anterior, cuando quedó nun 5,66 por cientu. A lo llargo de la selmana esti indicador estabilizóse al rodiu'l 5 por cientu, llende que marca la Organización Mundial de la Salú (OMS) pa tener controlada la pandemia.

Per segundu día rexístrense 18 muertes, a lo qu'hai que sumar un fináu non contabilizáu de díes anteriores, lo que pon el total del andanciu en 1.075. Nesta ocasión son trece muyeres de 96, 95, 94, 93, 92, 91, 89, 86, 84, 84, 82, 63 y 59 años, y cinco homes de 89, 86, 84, 78 y 62, de los que doce residíen nun centru de mayores.

Hai hospitalizaes 669 persones con confirmación o sospecha de la enfermedá causada pol coronavirus SARS-CoV-2, 35 más que'l miércoles, amás d'otres 129 na UCI, 4 menos.