“Mientres se decide’l recursu, la norma va siguir aplicándose ensin problema”, esplica Presno

Meses, inclusive años, podría tardar en salir la sentencia del Tribunal Constitucional sobre’l recursu d’inconstitucionalidá sobre l’usu del asturianu na Xunta Xeneral presentada por VOX. Miguel Ángel Presno Linera, caderalgu de Derechu Institucional y profesor de Derechu Constitucional de la Universidá d’Uviéu, rellata que la norma va “va siguir aplicándose ensin problema” nesi tiempu.

El Plenu del Tribunal Constitucional almitió a trámite’l día 17 el recursu d’incostitucionalidá sobre la reforma del Reglamentu de la Xunta Xeneral, aprobada pol Plenu del Parllamentu asturianu'l 1 de xunetu, que permite l’usu del asturianu na Cámara non sólo a los diputaos, sinón tamién a los miembros del Conseyu de Gobiernu, los cargos y emplegaos públicos y a cualesquier persona que compareza nel Parllamentu. La sentencia va tener como ponente al maxistráu Cándido Conde-Pumpido, de perfil progresista.

Los plazos son nidios, pero la realidá ye que les sentencies del Constitucional s’allarguen nel tiempu, munches vegaes pola falta de consensu. Por exemplu, la presentada pol PP nel 2010 contra la Llei de Salú Sexual y Reproductiva y de la Interrupción Voluntaria del Embaranzu entovía nun tien resolución.

“La personación y la formulación d’alegaciones deberán facese nel plazu de quince díes. Trescurríu el mesmu, el Tribunal dictará sentencia nel de diez, sacantes que, per resolución motivada, el propiu Tribunal estime necesario un plazu más ampliu que, en nengún casu, podrá esceder de trenta días”, esplica Presno, qu’añade que “estos plazos ye rarísimo que se cumplan, asina que nun ye previsible una sentencia a plazu curtiu; podría demorase meses o inclusive años”. “Mientres tanto la norma se sigue aplicando sin problema”, esplica, yá que “les normes se presumen constitucionales mientres nun quede acreditao lo contrario, polo que son los recurrentes los que deben probar que la reforma en nengún casu almite una interpretación constitucional”.

La documentación presentada por VOX va treslladase al Congresu, al Senáu, al Gobiernu estatal, a la Xunta Xeneral y al Conseyu de Gobiernu pa que puedan personase nel procesu. “Supónse que, al menos, la Xunta presentará alegaciones defendiendo la constitucionalidá de la reforma. Sicasí, anque nun lo fixera, eso nun implica que la Xunta almita que la reforma ye inconstitucional, pero nun sería mui lóxico qu’aprobara una reforma del Reglamentu y llueu nun defendiera de manera espresa la constitucionalidá”, analiza’l profesor de Derechu Constitucional.

Un asuntu “novedosu”

Presno nun s’atreve a pronosticar un desenllaz al recursu, al considerar que ye un tema “novedosu”, anque considera que “col vixente Estatutu d’Autonomía y la Llei de Promoción del Asturianu podría haber amparu suficiente pa la reforma”. L’anomalía que tien l’asturianu con respeuto a les otres llingües peninsulares, toes cooficiales a esceición del aragonés, fai que nun se diera esti casu en nengún Parllamentu autonómicu.

Nel recursu VOX considera que la reforma del Estatutu contradiz la reserva d’Estatutu d’Autonomía qu’afiten los artículos 3 y 81.1 de la Constitución. Asina, aleguen que l’usu del asturianu na Xunta Xeneral debería de facese al traviés de llei organíca, como ye la norma autonómica; en definitiva, cola declaración d’oficialidá.

Nel casu de salir alantre’l recursu d’inconstitucionalidá, l’artículu 3 bis del Reglamentu de la Xunta Xeneral, que derogó’l 11, eliminaríase. Esto nun supón tornar al anterior, que correspuende a la reforma del 1998 y qu’afitaba que “nel marcu de lo dispuesto pol Estatutu d’Autonomía y, nel so casu, pola llexislación que lu desendolca, los Diputaos podrán utilizar el bable nel exerciciu de les sos funciones parllamentaries”, sinón que podría obligar a una reellaboración del mesmu, camienta Presno.

Cola declaración d’oficialidá sí “ye probable que’l Tribunal Constitucional entendiera que’l recursu nun tien oxetu y nun entraría a resolvelo”.

Doce maxistraos

El Plenu del Tribunal Constitucional ta formáu por 12 maxistraos, anque anguaño hai 11 pola renuncia de Fernando Valdés Dal-Ré. Tamién ta pendiente la renovación de cuatro d’ellos, cuestiones que podríen provocar un retrasu de la sentencia qu’ha de presentar Conde-Pumpido pa la so aprobación nesti órganu.

El perfil de los componentes del Plenu podría ser determinante na sentencia final. Hai situaciones na que la resolución presentada pol ponente ye refugada, lo que podría llevar a la renuncia d’ésti a reellaborala, dilatando entá más los tiempos.

Mientres tanto, l’asturianu va poder siguir usándose con normalidá na Xunta Xeneral. Como hasta agora, enantes inclusive de la reforma del Reglamentu motivada pola postura de PP, VOX y Ciudadanos al negar l’usu de la llingua asturiana a la conseyera Berta Piñán.