Aumenten les cifres de la COVID-19: 399 contaxos con un 7,28 de positividá

Son 178 casos nuevos y un puntu más con respeuto a los datos del llunes. 21 persones perdieron la vida esti martes cola enfermedá causada pol coronavirus SARS-CoV-2.

A falta de conocer los datos oficiales de la COVID-19, la Conseyería de Salú comunicó qu'ayeri se detectaron 399 contaxos. Supón un ascensu nuevu tres trés díes siguíos de baxada dende'l vienres, cuando hebo 348.

La tasa de positividá medró también hasta un 7,28 por cientu tres la realización de 6.878 pruebes PCR, cifra asemeyada al del miércoles pasáu (7,09) depués de delles xornaes al rodiu del 6 por cientu. El llunes foi del 6,31 por cientu.

Na xornada hebo que llamentar 21 muertes: once son d'homes de 92, 92, 91, 90, 90, 88, 76, 74, 74, 58 y 56 años y diez, muyeres de 96, 94, 90, 87, 85, 85, 84, 77, 76 y 74, de los que 9 teníen el domiciliu en residencies.

Hai hospitalizaes 800 persones con confirmación o sospecha de COVID-19, 46 menos que'l llunes, a les qu'hai que sumar 145 pacientes na UCI, 1 más.

28 biltos en residencies

La conseyería detectó ente'l 17 y el 24 de payares un total de 28 biltos en residencies de mayores, 10 menos que la selmana anterior. En total contabilizáronse 390 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como brotos cuando hai al menos trés. Nesi sen, nesti periodu confirmaróse casos n'otros 34 centros residenciales.