Prorrógase’l zarru perimetral de Xixón, Uviéu y Avilés, figura que se va implantar el sábadu en Llaviana, Samartín del Rei Aurelio y Llangréu

El Gobiernu decidió prorrogar per segunda vegada’l zarru perimetral de Xixón, Uviéu y Avilés, nesta ocasión per quince díes más, hasta’l 3 d’avientu. Esta figura pa tratar de frenar l’espardimientu del coronavirus SARS-CoV-2 pel país va implantase’l sábadu tamién en Llaviana, Samartín del Rei Aurelio y Llangréu.

D’esta aforma, los ciudadanos nun van poder salir nin entrar nestos trés conceyos de la cuenca’l Nalón, como vien asocediendo nos trés más poblaos del país. L’empeoramientu de la situación de la pandemia de COVID-19 estes selmanes lleva a tomar esta decisión que va entrar a valir el sábadu tres espublizase mañana la resolución al respeuto nel BOPA, según confirmó esta mañana'l conseyeru de Salú, Pablo Ignacio Fernández Muñiz.

Les condiciones nun serán mui diferentes a les afitaes en Xixón, Uviéu y Avilés dende’l 24 d’ochobre, prorrogaes el día 8 hasta’l 18, y que se decide allargar 15 díes más dende güei, al contar con una incidencia acumulada esti llunes a 14 días de 860,6 casos por 100.000 habitantes en Xixón; de 646,4 n’Uviéu, y de 328,7, n’Avilés. Los trés porcentaxes correspuenden a un rangu de riesgu mui altu.

Cribaos masivos

Salú va entamar cribaos masivos como midía novedosa contra la COVID-19, que van principiar na área VIII, correspondiente a la cuenca'l Nalón, pa persones de 40 a 60 años que residan con mayores pa detectar asintomáticos posibles. Va facese ente persones que nun foran positivu y que nun fixera pruebes nel mes últimu.

Na semeya, Fernández Muñiz.