Barbón propondrá’l zarru d’Asturies tres la declaración del estáu d’alarma

Esti llunes va aconceyar el Comité de Crisis de COVID d’Asturies tres la declaración del estáu d’alarma por parte del Gobiernu d’España d’esti domingu, con toque de queda en tol Estáu menos Canarias. El presidente Adrián Barbón propondrá nel mesmu’l zarru d’Asturies pa trata de controlar la pandemia nel país al tener autoridá pa ello.

La sesión, convocada esta tarde p’analizar les midíes nueves a adoptar nel marcu del Estáu d’Alarma y faceles públiques depués de dicha xunta, va contar cola participación, amás de la Delegación del Gobiernu estatal n’Asturies y la Federación Asturiana de Conceyos, de los alcaldes de les trés zones en confinamientu perimetral dende’l sábadu, esto ye, Xixón, Uviéu y Avilés. Na mesma Barbón propondrá’l zarru d’Asturies.

D’esta forma, naide podrá salir nin entrar nel país ensin causa xustificada pa controlar la situación sanitaria pol coronavirus SARS-CoV-2. Una midida que’l socialista siempre defendió na primer fola de la pandemia de COVID-19 y que nun pudo poner en prautica por falta de competencies, y qu’agora l’estáu d’alarma, al nomar a los presidentes autonómicos como autoridaes delegaes del mesmu, si-y va permitir.

Toque de queda de 23 a 6 hores

Cola declaración del estáu d'alarma impúnxose pa tol Estáu, cola esceición única de Canaria pola so meyor situación epidemiolóxica, toque de queda de 23 a 6 hores. Les comunidaes autónomes van poder camudar esta franxa horaria 60 minutos perriba o perbaxo nel so entamu y nel so final.

Na imaxe, Barbón na comparecencia del vienres pa solicitar al Gobiernu d'España la declaración del estáu d'alarma. Semeya obra d'Armando Álvarez.