Zapico abrió les actividaes del DMR

Darréu adapta el Día de la Mocedá Revolucionario a la situación sanitaria, con actividaes repartíes a lo llargo del mes.

L'historiador', profesor y militante del Sindicatu Unitariu Autónomu de Trabayadores de la Enseñanza d'Asturies (SUATEA), Faustino Zapico, abrió'l sábadu'l DMR cola charra 'Cómo afeuta'l covid nes escueles'. Ésta tuvo llugar nel Llar La Llegra y emitióse en direuto peles redes de Darréu.

Ésta ye una de les midíes tomaes organización moza pa poder caltener la organización d'esta xornada homenaxe a los revolucionarios d'Ochobre del 34 que se completaba col conciertu 'Asturies nun escaez', qu'esti añu cai pola situación sanitaria. Otra ye entamar charres a lo llargo del mes, que se va completar esti vienres, a les 19 hores con 'La esplotación de les falses autónomes', a cargu de representantes de la Corriente Sindical d'Izquierda (CSI), y el vienres 23 a les 19.30 hores con 'EBHI en llucha', que va poner el trabayador Fernando González Rodríguez, que tuvo en fuelga de fame xunto con otros 3 compañeros, dambes nel espaciu uveín asitiáu n'El Postigu Baxu númberu 40.

"Precisamente esti añu dende Darréu queremos reinvidicar estes dates con más fuercia y puxu entá, pues prúyemos sacar a la mocedá del so alienamientu pa poder facé-y frente cohesionada, coordinada y conxuntamente al poder financieru internacional que, cola escusa d'esta pandemia que tamos sofriendo y de la crisis anunciada que irremediablemente vendrá darréu, ta estrechando cada vegada más el ñudu que tien puestu nel gargüelu de la clas obrera non namái d'Asturies, sinón del mundiu enteru, afogándomos pali pali", apunten dende la organización, que tamién va programar actividaes alredor de les ponencies.