Darréu aplaza pola situación sanitaria l'actividá última del DMR

|
Charra CSI falses autónomes DMR 2020 en La Llegra

Tratábase d'una charra sobre'l conflictu de la EBHI, qu'anguaño ta pendiente del xuiciu pol despidu del trabayador Adrián Serrano.

A les 19.30 hores d'esta tarde taba prevista nel Llar La Llegra la tercera de les actividaes del Día de la Mocedá Revolucionario (DMR) qu'entama Darréu tolos años n'homenaxe a los revolucionarios d'Ochobre del 34. Esta edición yá taba marcada pola situación sanitaria pola pandemia de COVID-19, lo qu'obligó a la non organización del conciertu 'Asturies nun escaez', pero l'empeoramientu de los datos de contaxos nestes selmanes tamién afeutó a la conferencia programada de Fernando González Rodríguez entitulada 'EBHI en llucha'.

El xixonés foi ún de los cuatro emplegaos d'European Bulk Handling Installation (EBHI) que tuvo en fuelga de fame, algamando los 37 díes n'ayunu, en defensa de lo firmao previamente pola empresa asitiada n'El Musel y de 7 puestos de trabayu. Ún de los zarraos, Serrano, yá despidíu, ta a la espera del xuiciu cola empresa, previstu ayeri y tamién aplazáu.

La charra de González Rodríguez va celebrase en fecha por confirmar cuando ameyore la situación sanitaria. Les que sí se pudieron poner foron la de Faustino Zapico, 'Cómo afeuta'l covid nes escueles', y la de la Corriente Sindical d'Izquierda (CSI) entitulada 'La esplotación de les falses autónomes'.

Na imaxe, un momentu de la conferencia en La Llegra sobre les falses autónomes.

Contador Estadistiques