La serie documental sobre la música asturiana ‘D’ayeri a güei’ estrénase’l xueves en TPA

Entrevistes a 30 persones en 17 llocalizaciones, y imáxenes históriques poco conocíes o inédites dan forma a ‘D’ayeri a güei’, documental sobre la música asturiana de los 150 años últimos que va emitir la TPA. Goxe Producciones lleva dos años trabayando nesta serie de 5 capítulos que va estrenase’l xueves.

D’una hora de llargor caún, nellos el públicu va poder conocer la historia de la escena sonora del país. Y ye que ‘D'ayeri a güei’ abarca dende finales del sieglu XIX hasta l'actualidá y quier ser un resume de la música d'espresión asturiana contemporánea.

Asina, van tratase los fechos más destacaos, los movimientos y tendencies más importantes y los y les intérpretes y grupos que más incidencia tuvieron. “Tien un enclín pedagóxico-divulgativu, ensin escaecer l'entretenimientu, pero siempre sobre la base de la rigurosidá”, según espliquen dende Goxe.

Col filu conductor de la voz n'off, que va contestualizando les palabres de los intervinientes, cuéntase la historia de la música asturiana dende los primeros rexistros sonoros en cilindros de cera hasta los nuestros díes, col enfotu de dar a conocer un patrimoniu perimportante de tolos asturianos y asturianes. Nes cinco entregues van tratase temes como'l nacionalismu musical asturianu, les primeres grabaciones, la edá d'oru de l'asturianada, la música coral, les bandines tradicionales, los concursos de tonada, el folk testimoniu, el Nuevu Canciu Astur, la música celta, el boom de la gaita, el rock n'asturianu o les últimes tendencies, ente otros munchos; amás de conocer la vida y obra d'intérpretes históricos como El Gaiteru Lliberdón, Los Cuatro Ases, Remis Ovalle, Diamantina Rodríguez o La Pastorina.

Too ello al traviés de les palabres de más d'una trentena d'intervinientes ente musicólogos, escritores, periodistes, historiadores, antropólogos, etnógrafos, cantantes y músicos, que van ufiertar una visión global sobre'l fechu musical asturianu de manera cronolóxica. Ismael Arias, Héctor Braga, José Ángel Hevia, Fe Santoveña, Pedro Pangua, Xosé Antón Fernández ‘Ambás’, Carlos Rubiera, Mariluz Cristóbal, María Rosa Quero ‘La Pastorina’, Ignaciu Llope, Xuan Xosé Sánchez Vicente, Lisardo Lombardía o Marta Mori son dalgunes de les persones que participen en ‘D’ayeri a güei’.

El públicu tamién va poder ver nesta serie documental imáxenes poco conocíes, rescataes d’archivos personales, de RTVE y TPA, ente otros, o, direutamente, inédites. Ente elles rescampla una entrevista fecha a Alan Stivell na so primer visita a Asturies, vídeos históricos del escomienzu de la 'música celta', ente ellos ún del grupu Güercu; un ensayu del grupu Asturcón; o les imáxenes en Super 8 tomaes na grabación del primer discu de Carlos Rubiera nun llagar de Garbelles, na parroquia xixonesa de Caldones.

Un equipu d’ocho persones

Xune Elipe (direutor, guionista y documentalista), Javier Lueje (realización y montaxe) y Damián Barreiro (redaición) son les cabeces visibles d’un proyeutu nel que trabayó un equipu conformáu por 8 persones. Complétenlo Lena Elipe (llocución), Javier Martínez (cámara), Ico Viña (cámara), Luisa Colado (logotipu) y Sergio Rodríguez (sintonía).

El primer episodiu va emitise esti xueves a les 23 hores en TPA. “‘D'ayeri a güei’ quier ser una serie na que los asturianos y asturianes s'autorreconozan y valga d'introducción a una de les nuestres señes identitaries más importantes”, afirmen los sos responsables.

Na semeya, fotograma de la entrevista a Hevia nel Aula Magna de la Universidá d'Uviéu.