‘Mundu Sidreru’ completa una nueche de cultura asturiana en TPA

Esti xueves, enantes de la emisión del primer capítulu de ‘D’ayeri a güei’, TPA va estrenar la tercer temporada de ‘Mundu Sidreru’ nuna nueche dedicada a la cultura asturiana. El periodista Inaciu Galán conduz 10 programes alredor la nuesa bébora nacional qu’incorporen a les cocineres del Club de Guisanderas de Asturias.

Estes profesionales de la nuesa gastronomía suponen una de les más destacaes novedaes d’esta temporada del programa que cuenta cola collaboración de la DOP Sidra d’Asturies. Asina, van encargase de les recetes sidreres, combinando productos asturianos con sidra.

La tercer temporada ‘Mundu Sidreru’ va siguir percorriendo toles facetes de la Sidra d’Asturies, visitando llagares, chigres, eventos y falando coles persones que más saben de la bebida insignia de la cultura asturiana, nun momentu difícil poles circunstancies, pero que la cultura sidrera asturiana ta sabiendo sacar alantre. Como ye vezu, cada programa va abrise con una entrevista con figures relevantes de la sociedá asturiana, alredor d’una botella y echando unos culinos n'espacios impautantes del paisaxe d'Asturies que se convierten en platós del programa colos yá célebres sillones oreyeros del espaciu, pelos que pasaron artistes como Víctor Manuel, María Cotiello, Hevia, Marisa Valle Roso, Vicente Díaz o Rodrigo Cuevas, ente otros.

La cantante Silvia Quesada va ser la convidada, nun alcuentru nel prau San Roque de Tinéu, nel episodiu primeru de la tercer temporada, que se va emitir mañana a les 22.22 hores en TPA. L'espaciu va dar amás un mayor protagonismu a los consumidores finales, con delles charres informales na sección ‘Sidreros auténticos/Sidreres auténtiques’, onde van pasar pel programa perfiles mui estremaos que tienen en común l'amor pola sidra y pola autenticidá que da la etiquetina de la DOP.

Esta temporada de ‘Mundu sidreru’ emítese na seronda depués de que’l confinamientu por cuenta la pandemia de COVID-19 nel mes de marzu obligara a parar la grabación, retrasando asina la so emisión.

Depués, estrena del documental sobre la historia de la música asturiana

Tres la emisión d’esti programa d’entretenimientu y información sobre la bayurosa cultura sidrera y l'activu mundu industrial, d'ociu y gastronomía que xira alredor de la Sidra d'Asturies, va estrenase en TPA, al rodiu les 23 hores, la serie documental sobre la música asturiana ‘D’ayeri a güei’. Esti espaciu, dividíu en cinco capítulos d’una hora de llargor, va facer un percorríu pela historia de la escena sonora del país nos 150 años últimos.

Na semeya, Galán entrevista a Quesada pal primer episodiu de la tercer temporada de 'Mundu Sidreru'.