Asturies rexistra 75 casos nuevos de COVID-19

Hai que llamentar una muerte más, la 356 de la pandemia y la sesta d'esta selmana.

La Conseyería de Salú confirmó 75 casos positivos por coronavirus SARS-CoV-2 ayeri, polo que la serie llega a 5.586. Les persones afeutaes na xornada presenten síntomes leves o son asintomátiques y tán n'aisllamientu nos sos llares, a esceición de 5 que tuvieron que ser ingresaes.

Na UCI hai anguaño 17 persones, 3 más que'l miércoles, y en planta 43, 4 más. Mentes, hebo 15 altes epidemiolóxiques, polo que'l total de curaciones queda en 2.286.

Una persona finó ayeri, un home de 68 años. Ye la sesta muerte d'esta xornada, tres les 2 del martes y los 3 del miércoles.

No que respeuta a les pruebes PCR, fixéronse un total de 3.290, polo que la tasa de positividá foi del 2,28. La barrera afitada pola Organización Mundial de la Salú (OMS) como indicador d'una perda de control de la pandemia ta nel 5 por cientu.

Insistencia a los veceros de los chigres d'alterne de Porceyo

Les autoridaes sanitaries insisten a los veceros del Vaya Bull o del Bora-Bora, nel xixonés polígonu industrial de Porceyo, ente los díes 10 y 26 del mes pasáu pa que contauten al traviés d'esti formulariu o del teléfonu 984.10.00.51. Hasta'l momentu namái 47 persones respondieron al llamamientu pa tratar de controlar esti biltu, que'l martes acumulaba 13 positivos.