17 focos de COVID-19 tán activos n'Asturies

|

Son dos más qu'hai una selmana. Esti miércoles rexistráronse 108 contaxos de coronavirus SARS-CoV-2 y 3 muertes.

El Serviciu de Vixilancia Epidemiolóxica, na so comunicación selmanal al Ministeriu de Sanidá sobre los biltos de COVID-19, confirmó 7 biltos nuevos de coronavirus, polo qu'anguaño hai un total de 17 activos que sumen 285 casos. Hai 14 díes la cifra yera de 10, y hai 7, de 15.

Dende'l vienres, tres el cambiu d'estratexa de detección temprana, vixilancia y control de la COVID-19 del ministeriu, considérase qu'un biltu ta activu cuando tuvo dalgún positivu nos 10 díes previos, tomando en consideración la fecha d'aniciu de síntomes o la del diagnósticu. Hasta agora'l periodu afitáu yera de 14 díes.

Tasa de positividá del 3,06 por cientu

La Conseyería de Salú anunció 108 positivos ayeri –111 nos datos oficiales al incorporar 3 casos confirmaos con fecha de diagnósticu anterior–, xornada na que se fixeron 3.527 pruebes PCR, polo que la tasa de positividá foi del 3,06 por cientu. Les persones afeutaes tienen síntomes leves o son asintomátiques y tán n'aisllamientu nos sos llares, a esceición de cuatro que necesitaron hospitalización.

El día zarróse cola noticia de la muerte de 3 persones, un home de 91 años y dos muyeres de 82 y 88, toos ensin rellación con nengún centru residencial sociosanitariu, polo que yá s'acumulen 5 perdes esta selmana tres les 2 del martes. Dende que principió l'andanciu 355 persones perdieron la vida con COVID-19.

Según los datos oficiales, na UCI hai 14 persones ingresaes, 2 menos qu'ayeri, y en planta 39, 5 menos. Recibieron l'alta epidemiolóxica 2 persones, polo que'l total de curaciones queden en 2.271.

Contador Estadistiques