Tuxa, una autora recuperada

La XLI Selmana de les Lletres Asturianes ta dedicada a María Teresa Villaverde ‘Tuxa’, escritora maliaya del Rexonalismu asturianu nacida nel 1882. Gran parte de la so obra ye desconocida y la que nos llegó foi de manera tardía al nun quedar rexistrada l’autora nes antoloxíes canóniques del so tiempu.

Ello foi que quedara nel escaezu hasta la década de los 90, cuando en ‘Lletres asturianes’ recupérense de la mano d’Etelvino González López y Xurde Blanco dalgunes de les sos cartes y poemes espublizaos en publicaciones como la revista oficial del Centro Asturiano de Buenos Aires o na ‘Asturias’ del Centro Asturiano de Madrid. Natural de Tornón, yera fía de María Dolores Generosa Villaverde Uría y Rosendo Villaverde de la Llera, una familia de fidalgos.

Tuxa estudió nes carmelites d’Uviéu y asoleyó les sos primeres poesíes na prensa local, en concreto en ‘Villaviciosa’ y ‘Villaviciosa hermosa’, nes que tamién escribió cróniques d’actualidá baxo l’alcuñu ‘Un Coruxu’. Estos poemes son los que más se conserven xunto coles de les revistes de la emigración.

Na so trayeutoria lliteraria tamién atopamos obres teatrales, como ‘El balcón de la reina Lindhaja’ o’l ‘Príncipe encantáu’, de les que llegaron a los nuesos díes namái delles escenes de la segunda. Mui relixosa, Tuxa dio catecismu y tocó esta temática nes sos obres.

Un accidente de coche en Sariegu camín de Villaviciosa finó cola so vida nel 1934 con 51 años. Mañana la so figura va ser recordada cola estrena del documental ‘Tuxa, sentimientu y tradición’ y la presentación del llibru conmemorativu ‘Postrer adiós. Prosa, poesía, teatru’, edición a cargu de Lluis Portal, estudiosu que yá escribiera previamente sobre la so vida, actos que van tener llugar al meudía na Casa de los Hevia de Villaviciosa y que van servir d’inauguración de la Selmana de les Lletres Asturianes.