118 personalidaes de la cultura asturiana roblen un manifiestu nel que reclamen una presencia digna na RTPA

Escritores, músicos, actores, dibuxantes promotores, editores..., hasta sumar un total de 118 persones, roblaron un manifiestu de títulu ‘Por una RTPA al serviciu de la cultura asturiana’. Nél piden una “presencia digna, global y permanente de la cultura asturiana” nel ente públicu de comunicación de país.

Ente los firmantes hai escritores como Xandru Fernández, Adolfo Camilo Díaz, Nicolás Bardio, José Ángel Gayol, o Paquita Suárez Coalla; músicos como Nacho Vegas, Hevia, Víctor Manuel, Rodrigo Cuevas, José Manuel Tejedor, Mapi Quintana, Xuacu Amieva o Silvia Quesada; miembros de grupos como Llan de Cubel, Felpeyu, Corquiéu, Dixebra, Los Berrones, Desakato, Skama la Rede o Misiva; actores como Antón Caamaño, María Cotiello, Carlos Alba o Antón González; editores como Silvia Cosío (Suburbia) o Esther Prieto (Trabe); dibuxantes como Miguel Solís Santos o Alberto Vázquez; o promotores como Guillermo Pérez (Fabriok), Marcos Valle (Actos Management) o Abel Pérez (Mialma Producióis). Toos reclamen “apostar por dignificar la presencia de conteníos culturales y musicales del país (mui especialmente n'asturianu y gallego-asturiano) na programación, con un tratamientu dignu, global y permanente nella”.

El manifiestu recuerda los entamos de la RTPA, “ún de les pidimientos históricos del movimientu cultural asturianista, mesmamente cuando mui pocos estamentos lo veíen necesario (políticos, empresariales, periodísticos, etc.)”, dalgo qu’enllenó d’esperances al sector cultural asturianu. Sicasí, bien ceo esvaneciéronse nel casu de la TPA “en viendo’l modelu pel qu’empobinó la so programación; el fracasu social y económicu al que llevó obligó a un cambiu de rumbu radical que se caltuvo nel tiempu, con una visión de lo asturiano mui restrictiva y simplista”.

“Mentanto, los primeros pasos del serviciu radiofónicu (RPA) paecíen ufiertar bonos augurios, asina la so parrilla enllenóse de programes y espacios en llingua asturiana colos más variaos conteníos y atentos al fechu cultural y musical del país, pero namás foi un espeyismu nel tiempu y darréu foron desapaeciendo dafechu de les so emisiones”, sigue’l documentu. Quince años depués la realidá ye que, tanto en TPA como en RPA, “sacante esceiciones honroses, sigue ufiertándose una mirada mui sesgada, en delles ocasiones raspiando lo folclorizante, cola cultura asturiana –entendida ampliamente–. Mesmamente, nun existe a día de güei nengún espaciu dedicáu específicamente a la lliteratura o la música nes llingües propies del país”.

Poro, los firmantes, que busquen llamar l'atención sobre'l papel clave que l'ente públicu de comunicación asturianu tien que xugar nesti momentu d'incertidume d'un sector yá de por sí mui sensible, entienden que “la RTPA ha ser la ferramienta que posibilite la popularización de les creaciones de los nuestros y nuestres artistes, motor del afitamientu de la industria cultural y de los/es sos trabayadores”. Pa finar, afirmen que “siguimos apostando por unos medios de comunicación públicos, como históricamente fiximos, pero tamos convencíos/es de que namás van tener incidencia y futuru si se ponen al serviciu de la sociedá y la cultura asturianes”.