La celebración del Día'l Traxe'l País aplázase pola situación sanitaria

El concursu 'Indumentaria' va tornar nel 2021.

"Danos bien de pena, porque somos felices vistiendo la nuestra indumentaria tradicional, enseñándola y dándo-y valor. Pero esti 2020 la situación sanitaria manda y xuntar tanta xente como vien al Día'l Traxe'l País nun ye seguro", esplica B. Alto, empresa organizadora y creadora d'esta iniciativa que venía celebrándose en Grau nos primeros díes de la seronda. Asina, los ciudadanos de Grau y los munchos visitantes que s'averen a la villa esa xornada han d'esperar un añu pa disfrutar de la quinta edición d'un eventu nel que la música tradicional y el baille tienen tamién un protagonismu importante.

La exa central d'esta celebración ye 'Indumentaria', concursu que se desendolca frene a la capiella de Los Dolores, llugar que se convierte nuna pasarela de moda de vistimienta tradicional asturiana de la segunda metá del sieglu XIX. "Asturies ta demostrando ser un país responsable y vamos siguir siéndolo too lo que faiga falta. Por nosotros que nun quede. ¡Vémonos en 'Indumentaria' 2021!", espresa la organización en redes sociales.

Semeya obra d'Ojos de Hojalata Fotógrafo.