Rodríguez Medina, académicu correspondiente nuevu de l’ALLA

L’Academia de la Llingua Asturiana (ALLA) noma a Pablo Rodríguez Medina como académicu correspondiente de la institución. “Nun hai cielu más altu que tocar”, espresó l’escritor entreguín tres facese públicu esti determín decidíu por unanimidá.

“El so currículu lliterariu, de primer nivel, ta compuestu d’obres de gran valir nos trés grandes xéneros, lo que-y fixo collechar bien de premios del mayor prestixu igual en narrativa, qu’en poesía y en teatru. Amás del so llabor creativu, la xunta estraordinaria de l’ALLA quixo sorrayar la importancia de la so contribución pedagóxica, que vien exercitando nel ámbitu regláu como profesor funcionariu de Secundaria y tamién como docente, dende cuantayá, de la Universidá Asturiana de Branu. Poro, y pol so espíritu de collaboración permanente, l’Academia nun quier dexar de reconocer la so fidelidá incondicional a la Institución”, comunicóse esta mañama.

Rodríguez Medina, pela so parte, afirmó que “un hai cielu más altu que tocar”. “Toi tentando asimilalo, buscando les pallabres afayadices... Pallabres dexaes n'heriencia qu'hai que caltener y da-yos aliendu pa que nos sobrevivan, esi ye'l mio enfotu”, añadió.

L’escritor de L’Entregu va recibir la so condición nueva d’académicu correspondiente de l’ALLA’l 2 d’ochobre nel actu pol XLI Día de les Lletres Asturianes. Aplazáu a la seronda, esti eventu pasa a celebrase del Campoamor al Aula Magna de la Universidá d’Uviéu por mor de la situación actual de crisis sanitaria pola pandemia de COVID-19.

Na semeya, Rodríguez Medina nuna edición de la Universidá Asturiana de Branu (UABRA) qu'entama l'ALLA en Cangas del Narcea.