“Anque esista una sola matrícula, l’alumnáu tien drechu a la formación n’asturianu”, recuerda Iniciativa

Col entamu del cursu cercanu, Iniciativa pol Asturianu quier aprovechar esti momentu pa recordar a les families y al alumnáu la posibilidá que tienen de matriculase n’asturianu magar les torgues que puedan atopar en delles escueles y institutos. “Anque nun centru esista una sola matrícula na asignatura, l’alumnáu tien drechu a la formación llibre n’asturianu o gallego-asturianu”, esplica.

“Añu tres añu alcontrámonos con una montonera de families que tienen dificultaes p’apuntar a la reciella na asignatura d’asturianu, con unes inscripciones y formularios nos que munchos casos nun apaez la opción d’asturianu, y dempués munchos alumnos y alumnes que queden ensin profesor”, apunten dende esti coleutivu, que reclama a la Conseyería d’Educación “que garantice’l suficiente profesoráu d’asturianu o de gallego-asturianu, asina como los medios pa desarrollar el llabor docente nesti añu tan complicáu”. Considera esti compromisu clave “pa da-y estabilidá y continuidá a l’asignatura nos centros y siguir medrando’l númberu de matrícules”.

El cursu pasáu na escuela pública 16.466 escolines y escolinos matriculáronse en Primaria a la materia de Llingua Asturiana o Gallego-asturiano, onde ye optativa cola alternativa única de Cultura Asturiana. En Secundaria la cantidá foi 3.809 y en Bachilleratu, 426, etapes onde compite con una segunda llingua estranxera y otres materies.