Iniciativa pol Asturianu detecta delles irregularidaes nel entamu del cursu

La non concesión d'espacios pal exerciciu de la docencia, una organización deficiente de los horarios o, inclusive, la xuntura de les asignatures de Cultura y Llingua Asturiana en Primaria son dalgunes de les irregularidaes detectaes por Iniciativa pol Asturianu nesti entamu del cursu. La organización entama un alcuentru telemáticu con profesores pa recoyer denuncies y treslladales a la conseyería.

La web d’Iniciativa pol Asturianu tien un formulariu abiertu pa cualquier maestru que quiera participar nel conceyu sobre les problemátiques que tán atopando nestes primeres selmanes de preparación de la vuelta a la escuela, prevista pal día 22 pa Infantil y Primaria. Tamién convida a los responsables sindicales pa qu’acudan al alcuentru que se va convocar próximamente al considerar “importante sumar esfuercios y llograr treslladar unánimemente les necesidaes de los educadores”.

Y ye que la intención ye recoyer toles demandes del profesoráu pa depués treslladales a la Conseyería d’Educación cola intención de que solucione los problemes que se tán detectando nesti entamu del cursu. Ente dalgunes de les denuncies treslladaes a Iniciativa pol Asturianu tán la non concesión d'espacios pal exerciciu de la docencia, una organización deficiente de los horarios o, inclusive, la xuntura de les asignatures de Cultura y Llingua Asturiana en Primaria.

Na semeya, un institutu públicu del sistema educativu asturianu.