Aumenta a 23 el númberu de persones ingresaes en planta afeutaes cola COVID-19

Salú comunica un biltu nel Centru Polivalente de Recursos pa Persones Mayores de Les Arriondes con 3 positivos. Anuncia tamién 29 contaxos, 33 según los datos oficiales.

Los datos de la COVID-19 n'Asturies dexaron la esmoleciente cifra de 10 ingresaos más en planta cola enfermedá causada pol SARS-CoV-2. Hasta anteayeri había 13 pacientes rexistraos y a la medianueche d'ayeri esta cifra medró hasta 23, a los qu'hai que sumar los 4 que siguen na UCI.

El Serviciu de Vixilancia Epidemiolóxica notificó tamién 29 positivos na xornada, de los que 5 tán venceyaos al oriente, anque los datos oficiales aumenten esta cifra a 33. Ente ellos nun se cuenten los 3 del biltu de Les Arriondes, que se van comunicar mañana al Ministeriu de Sanidá.

Les autoridaes fixeron un cribáu tres diagnosticar el primer casu, lo que permitió detectar otros dos afeutados. D'ellos, ún ta hospitalizáu y los otros dos n'aisllamientu nel Centru de Referencia Estatal pa Persones con Discapacidaees Neurolóxiques de Llangréu (Credine).