83 años de la creación del Conseyu Soberanu d'Asturies y Lleón

El 24 d'agostu del 1937 roblóse en Xixón, na nomada 'Casa Blanca', el decretu qu’afitaba la soberanía d'estos territorios baxo la presidencia del socialista Belarmino Tomás.

L'aisllamientu que vivía'l país tres la toma de los nacionales de los territorios vecinos nel marcu de la Guerra Civil llevó a los republicanos asturianos a dar esti pasu. El Conseyu Soberanu d'Asturies y Lleón entraría en vigor un día depués de la firma del decretu, espublizándose en prensa la noticia'l día 26.

Toles organizaciones polítiques y sindicales del bandu republicanu n’Asturies taben representaes nesti Gobiernu, qu'emitió moneda y sellos propios y llegó a unviar un telegrama a la Sociedá de Naciones, aición esta última que foi'l principal principal motivu de resquiebra col Gobiernu de la República con sede naquel momentu en València. El PCE, sobre manera, y tamién dirixentes de les Xuventúes Socialistes Unificaes (JSU) y Izquierda Republicana criticaron la declaración unillateral d'independencia de 24 d'agostu.

El Conseyu Soberanu d'Asturies y Lleón tuvo activu hasta'l 21 d'ochobre, cuando les tropes nacionales entraron en Xixón y Avilés. Un día enantes, celebraba'l so aconceyamientu caberu.

Dende Asturies.com recordamos esta fecha con estos artículos de la nuesa hemeroteca:

• 1937, cuando'l gobiernu asturianu declaró la soberanía
• La composición del Gobiernu Soberanu
• El polémicu telegrama del Conseyu a la Sociedá de Naciones
• La prensa americana anunciaba hai 81 años la creación d'un "estáu asturianu"​

Na semeya, moneda acuñada pol Conseyu Soberanu d'Asturies y Lleón, nomada popularmente 'belarminos'.