La prensa americana anunciaba hai 81 años la creación d'un "estáu asturianu"

"Los anarquistes dan un güelpe d'estáu, ruempen col Gobiernu central y creen una dictadura asturiana presidida por Belarmino Tomás” informaba Associated Press. Esta información tuvo repercusión n'Estaos Xuníos, onde decenes de cabeceres recoyíen un 14 de setiembre del 1937 la creación d'un estáu asturianu.

Hai 81 años qu’a finales del mes d’agostu’l Gobiernu asturianu declaraba la so soberanía metanes la guerra civil, nomando autoridades militares propies, destituyendo a les republicanes, y asumiendo’l control en tol territoriu que controlaba.

Esti fechu provocó delles tensiones col gobiernu republicanu d’Azaña y mesmamente un conatu de conflictu internacional, al dirixise’l gobiernu, presidíu por Belarmino Tomás a la Sociedá de Naciones, denunciando los bombardeos de l’aviación a la población civil.

La noticia nos medios d’EEUU

Nel documentu que presentamos nel 2016 n’Asturies.com pela primer vegada n'Asturies vese como esta noticia tuvo, delles semanes depués, un espaciu importante nes cróniques de la Guerra Civil qu’apaecíen periódicamente na prensa norteamericana. Asina se pue comprobar en delles hemeroteques dixitales de periódicos de la dómina.

La corresponsalía de guerra de l’axencia Associated Press, asitiada n’Hendaia, recueye unes informaciones –da como fonte a servicios secretos y a les tropes franquistes asitiaes n’Irun– nes que se fala de la creación d’un “nuevu estáu asturianu”.

Según AP, nuna información que recueyen decenes de cabeceres locales nos Estaos Xuníos el 14 de setiembre, el líder del güelpe que rompía col Gobiernu central español yera Belarmino Tomás, que se declarara a sí mesmu "dictador" del estáu nuevu.

La imaxe que se reproduz na cabecera de la noticia ye del periódicu Deseret News, de Salt Lake City, estáu d'Utah. Más abaxo pue vese la mesma noticia na portada de The Fresno Bee (California).

L'axencia diz que delles de les primeres midíes tomaes poles autoridades del estáu foron la execución d’altos mandos, y el prinde del xeneralatu de les tropes republicanes del norte y de los expertos militares estranxeros.

La noticia sigue falando de delles aiciones de guerra como la conquista pela parte de les tropes franquistes de posiciones ente la retirada de les “tropes asturianes” y de la amenaza del Gobiernu de Belarmino Tomás de tomar represalies sobre los prisioneros si siguen los bombardeos a la población civil.

Anarquistes o socialistes

Anque nel Gobiernu soberanu asturianu los anarquistes teníen pesu abondo, Belarmino Tomás pertenecía al PSOE. Probablemente l’usu del anarquismu como elementu que rescampla na noticia tenía que ver col clima esistente nos propios Estaos Xuníos, onde “l’amenaza anarquista” taba mui presente nos años 30 pola importancia que tenía esta corriente de pensamientu nel entornu sindical del país.

Esta información foi espublizada per primer vegada'l 21 d'ochobre del 2017.