La Conseyería de Salú notificó güei al Ministeriu de Sanidá 40 nuevos contaxos

Dende la fin del estáu d'alarma, el Principáu contabilizó 498 casos de covid-19.

La Conseyería de Salú notificó güei al Ministeriu de Sanidá 40 nuevos contaxos de coronavirus, de los que 9 son contactos estrechos de casos previos y 7 son importaos. Otru de los nuevos infectaos ye una persona rellacionada con unu de los biltos conocíos. El restu ta n'estudiu para establecer el so venceyu epidemiolóxicu.

Toles persones afectaes tan n'aislamientu nes sos cases.

En relación col peneráu comuñal realizáu en Po de Cabrales, el Serviciu de Salú del Principáu (Sespa) completó tomar d'amueses a la población y nes próximes hores van conocese los resultaos. Nesti sentíu, les persones qu'aguarden esos resultaos tienen de restrinxir la so vida social.

En rematando l'estáu d'alarma, el Principáu contabilizó 498 casos de covid-19. El perfil mediu de la persona contaxiada ronda los 38 años y presenta síntomes leves o ausencia d'ellos. Amás, la enfermedá afecta de manera bien similar a home y muyeres.

Dende l'entamu del andanciu, el Serviciu de Salú realizó una media diaria de 1.389 pruebes PCR. Sicasí, dende'l 6 de xunetu amontóse'l númberu de pruebes realizaes, alzando la media a 1.572. Nos postreros 7 díes, la cifra aumentó hasta les 1.984.

Salú recuerda a la ciudadanía que'l pasáu martes entraron a valir les midíes alcordaes contra'l coronavirus qu'inclúin, ente otres iniciatives, el pieslle de los locales d'ociu nocherniegu, la prohibición de fumar nes cais si nun hai distancia mínima interpersonal de, siquier, dos metros y el refuerzu del control de consumu d'alcohol ensin autorizar nes víes públiques. Amás, pa los establecimientos d'hostelería y restauración fíxase l'horariu máximu de pieslle a la una de la madrugada.