Asturies llamenta la víctima 341 con COVID-19, la primera contaxada tres el confinamientu

Esti domingu rexistróse, 27 díes depués, una muerte nueva n’Asturies con COVID-19. Si la del 27 de xunetu correspondía a un home ingresáu na UCI dende marzu, nesta ocasión la finada contaba con una enfermedá grave previa agravada pol coronavirus SARS-CoV-2, cola particularidá de ser la primer perda d’un paciente contaxáu tres el confinamientu y l'apertura de la movilidá nel Estáu.

Dada la so situación, la víctima 341 de la pandemia de COVID-19 nel país, nun taba ingresada na UCI. Tratábase d’una muyer de 71 años que dio positivu nesta segunda fola que ta viviendo Asturies tres el confinamientu por un virus que caltién, según los datos daos pola Conseyería de Salú esta mañana coles cifres rexistraes hasta ayeri, a 3 persones na UCI y 8 en planta.

Nos trés díes últimos hebo n’Asturies 75 contaxos, que ponen el total de la serie en 3.048. El númberu de curaciones queda, mentes, en 2.139, tres sumar 14 esta fin de selmana.