Dos contautos estrechos de positivos que taben en siguimientu, casos nuevos de COVID-19

Ún d'ellos tien que ver con un focu en Navarra y otru con un casu importáu de Catalunya.

La Conseyería de Salú anunció dos casos nuevos de COVID-19 n'Asturies. Dambos son contautos estrechos d'otros positivos y guardaben cuarentena por tar en siguimientu por si podríen tar contaxaos de coronavirus SARS-CoV-2.

Según los datos aportaos pol Serviciu de Vixilancia Epidemiolóxica, un casu vien de la rellación d'un mozu con una persona afeutada por un focu esistente en Navarra. L'otru ye una conviviente con la moza que foi positivu el sábadu na área sanitaria d'Uviéu tres regresar de Barcelona.

Los dos presenten síntomes leves y siguen n'aisllamientu nes sos cases. Con estos contaxos, Asturies yá suma 2.450 casos dende l'entamu del andanciu.

Los datos restantes de la serie nun sufren cambios con respeuto a los del llunes.