Deira va tocar na edición del 2021 del gallegu Festival de Ortigueira

El tríu folk asturandaluz Deira ye ún de los trés finalistes del proyeutu Runas de valores nuevos de la música de raigañu celta. Esti fechu conviértelu automáticamente en banda participante del Festival Internacional do Mundo Celta de Ortigueira del 2021.

Los andaluces Salvador Daza (violín) y Juan Almaraz (flauta irlandesa), y l'asturianu Gonzalo Llao (bouzouki) componen Deira, grupu formáu l’añu pasáu p’animar les xornaes nel chigre d’Asturies nel Festival Interceltique de Lorient, onde tamién foi finalista del C'hoariadeg Sonerezh Keltiek Loïc Raison, troféu de música celta que tien llugar mientres el certame. Los trés vienen de grupos folk de diferente estilos: Daza, de Young Forest; Almaraz, de Stolen Notes; y Llao, de Vrienden.

Con un añu de vida, el proyeutu Runas permite agora a estos músicos asegurase un puestu nel cartelu del Festival de Ortigueira del añu qu’entra, previstu del 14 al 18 de xunetu. 35 bandes participaron nesti concursu, nel que’l xuráu profesional y popular escoyó a los trés finalistes que van competir nel certame gallegu xunto los del añu pasáu por tocar na edición del 2022 nel escenariu central.

En concreto son, amás de Deira, los escoceses Holiday Club y los gallegos Faíscas da Pontraga, que van recibir un caché de 1.500 euros caún. Cerca de 110.000 persones participaron nes votaciones.