Deira va tocar nel Celtic Connections de Glasgow

|
Deira

El tríu folk asturandaluz Deira sigue ganándose un nome nel mundu de la música. Llueu de participar nel Festival Interceltique de Lorient del 2019 como animador del chigre d’Asturies y nel concursu C'hoariadeg Sonerezh Keltiek Loïc Raison, y con presencia confirmada nel Festival Internacional do Mundo Celta de Ortigueira del 2022, va volar hasta Alba en xineru pa tocar nel Celtic Connections.

L’importante festival de música celta y de raigañu, que programa del 20 de xineru al 6 de febreru más de 300 actuaciones d’artistes y formaciones escoceses y d’otros territorios de tol planeta, inclúi esta edición a la banda compuesta pol asturianu Gonzalo Llao (bouzouki) y los andaluces Salvador Daza (violín) y Juan Almaraz (flauta irlandesa). Creáu nel 1994, pelos sos escenarios pasaron numberoses formaciones asturianes, como Llan de Cubel, Tejedor o Corquiéu, asina como importantes músicos del país.

Agora ye’l turnu de Deira, que va tocar el sábadu 29 de xineru a les 13 hores na llamativa Drygate Brewery dientro de l’actividá ‘Battle of the Folk Bands’, esto ye, la batalla de les bandes folk, con entraes a la venta a un preciu de 11 libres. Una bona oportunidá pa dase conocer énte un públicu entendíu como l’escocés.

Contador Estadistiques