Bimenes engalana la Casa Conceyu pa una Fiesta pola Oficialidá ensin folixa pero con reivindicación

Les banderes de Miranda de l Douro y Sáḥara Occidental yá llucen na balconera de la Casa Conceyu de Bimenes xunto a l’asturiana de cara a la XXIV Fiesta de la Oficialidá de la Llingua Asturiana del sábadu. Esti añu nun va haber folixa por cuenta la crisis sanitaria, pero sí un actu institucional en llinia y una representación teatral.

L’alcalde Aitor García Corte va facer una declaración formal favoratible a la oficialidá del asturianu a les 12 hores nun actu institucional dende la Casa Conceyu. Ésta va poder siguise en direuto al traviés del Facebook del Conceyu en Facebook y va contar tamién con unes pallabres d’Artur Nunes, presidente de la Cámara Municipal de Miranda de l Douro, territoriu hermanáu con Bimenes al igual que la población saḥariana de Farsía, y una actuación d’una pareya de tambor y gaita.

De tarde, con un aforu reducíu de 50 persones, el Grupu de Teatru de l’Asociación Cultural Maura Xeva va poner n’escena la obra ‘Muyeres na mina’ con toles midíes de seguranza tanto p’actores como pal públicu. P’acceder a la representación, que va tener llugar a les 20 hores na Casa Cultura de Santuyano, ye necesario retirar una invitación que se reparte de baldre na Casa Conceyu y acudir con mázcara.

D’esta forma, magar la situación actual pola pandemia de COVID-19, Bimenes nun quixo dexar de recordar la declaración d’oficialidá del 1997, el 5 de xunetu, qu’un añu depués torgaríala’l Tribunal Superior de Xusticia d’Asturies (TSXA) al considerar que nun tenía competencia pa ello. Baxu mandatu del alcade actual, nel Plenu nel 2016 que coincidía col venti aniversariu d’esti fechu, el Conceyu tornaba a declarala.