La prueba d'asturianu de nivel B2 va principiar el 3 d’ochobre

Yá hai feches nueves pa la prueba de certificación d’asturianu adaptada al Marcu Común Européu de Referencia pa les Llingües de nivel B2 intermediu. El bloque 1 va tener llugar el sábadu 3 d’ochobre pela mañana, mentes que los esámentes del bloque 2 van principiar el día 5 y va allargase nes xornaes siguientes.

La Conseyería d’Educación confirmó güei cuándo va celebrase’l B2 d’asturianu, anunciáu pal trimestre últimu del añu. Finalmente nun va retrasase muncho, yá que la primer prueba, el bloque 1 correspondiente a la producción y coproducción de testos orales y la mediación, na que l’esamináu fai d’intermediariu ente dos interlocutores que nun son quien a entendese de manera direuta, va celebrase’l sábadu 3 d’ochobre pela mañana –en mayu taba convocada un vienres de tarde–.

Los esámenes del bloque 2, que diben entamase nos díes previos al 1, agora pasen a tener llugar depués, dende’l llunes 5. Éstos van consistir na producción y coproducción de testos escritos, comprensión de testos orales y comprensión de testos escritos que cada alumnu va facer nuna mesma xornada, na que lu convoquen.

Tres finar el plazu de pagu de tases, el día 30 va espublizase la llista provisional d’inscripción. Del 1 al 3 de xunetu va abrise el d’alegaciones.

Na semeya, Facultá de Formación del Profesoráu y Educación de la Universidá d’Uviéu, que va acoyer los esámenes del bloque 1.