El Plan de Normalización de Xixón va aprobase nel Plenu d’esti mes

La Comisión de Servicios y Derechos Sociales del Conceyu de Xixón d’esti xueves va tratar el Plan de Normalización Llingüística 2020-2023 que tuvo'l preste del Conseyu Asesor de la Llingua en marzu col únicu votu en contra de VOX y l’astención de Ciudadanos. La intención va ser algamar el mayor consensu posible de cara a la so aprobación nel Plenu d'esti mes, previsiblemente'l día 24.

Ésta ye la fecha que se manexa pa la so convocatoria, anque entovía nun ta zarrada. Los votos del PSOE, Xixón pela Izquierda (IX-IAS), Podemos-EQUO y Foro garanticen l’aprobación d’un documentu continuista col anterior, el del periodu 2016-2019, que daquella tamién tuvo’l sofitu de Ciudadanos.

El trámite de mañana va servir pa sentir los posicionamientos yá conocíos de los grupos municipales y dar el preste pa la votación del documentu en Plenu, pero la intención ye sumar a la formación naranxa al consensu, dalgo que ye imposible con VOX, según les manifestaciones de los sos responsables contra l'asturianu.

El PP votó a favor del testu nel Conseyu Asesor, anque nun se descarta que soprenda con un xiru nel so posicionamientu daes unes declaraciones contraries al documentu de la conceyala Ángeles Fernández-Ahuja.

Nesi sen, l’alcaldesa de Xixón, Ana González Rodríguez, recordó güei que’l Plan lo que fai ye cumplir cola Llei d’Usu y Promoción del Bable/Asturianu aprobada pol PP baxo’l Gobiernu de Sergio Marqués.

Na semeya, primer xunta del Conseyu Asesor de la Llingua de Xixón nesta llexislatura.