Iniciativa pol Asturianu esixe que nengún alumnu quede ensin clase d’asturianu por falta de profesoráu

“Ye un drechu irrenunciable de los neños y de les neñes estudiar asturianu en cualesquier centru educativu (concertáu o públicu) y tamién en cualesquier etapa educativa dende Infantil a Bachilleratu”, recuerda Iniciativa pol Asturianu. La organización tien en marcha una campaña pa promover la matriculación na materia.

“Queremos animar a les families a qu’escolaricen a los y les estudiantes na asignatura d’asturianu nel cursu qu’entra pa consiguir que l’idioma siga tresmitiéndose nes nueves xeneraciones de forma más efectiva”, esplica’l vocal Inaciu Galán. Centros educativos, profesoráu, sindicatos, asociaciones de padres y madres y families en xeneral son los destinatarios de 7 cartelos, con versión en llingua asturiana y en gallego-asturiano, que rescamplen la importancia de caltener y medrar el númberu d’estudiantes de l’asignatura.

“Ye un trabayu conxuntu de la sociedá’l consiguir fomentar la formación y les competencies llingüístiques n’asturianu, más cuando nun momentu como l’actual los y les estudiantes pueden dir formándose p’algamar nel futuru el títulu B2 y la so certificación como una llingua más. Esta formación qu’entamen na educación obligatoria va vali-yos muncho nel futuru, pues ye un elementu que favorez la conocencia del so entornu, asina como les capacidaes pa deprender otres llingües”, añade Galán.

Iniciativa pol Asturianu demanda tamién a la Conseyería d’Educación y a la Direición Xeneral de Política Llingüística, “un esfuerciu pa que nengún alumnu o alumna vuelva quedar ensin clas d’asturianu o gallego-asturianu por falta de profesoráu. Dende la nuesa organización llevamos bien de tiempu denunciando decenes de casos nos que l’alumnáu queda ensin profesoráu y ensin l’asignatura que llibremente escoyeron”, como asocedió esti mesmu cursu.

La organización recuerda que, nel casu de que dalgún alumnu tuviera dificultaes pa matricular na asignatura, ufre asesoramientu y ayuda nel procesu de reclamación.

Nes semeyes, dos de los cartelos pa institutos de la campaña.