Día del Llibru Asturianu

Iniciativa afala a axilizar los trámites pa garantizar la inscripción del profesoráu nuevu d'asturianu

|
Llibretes

Los estudiantes qu’acaben esti cursu'l Máster de Formación del Profesoráu podríen nun llegar a tiempu d'inscribise na llista de la especialidá d’asturianu por “falta d’axilidá alministrativa”, asegura Iniciativa pol Asturianu. Insiste en que nun se torne a repetir en setiembre qu'haya centros que queden ensin maestru.

La Conseyería d’Educación ta acabante d’abrir les llistes de delles especialidaes, ente elles la d’asturianu, “pero probablemente nun se pueda inscribir parte de la xente con formación pa ello”, apunta Diego Solís. “Los qu'acabaron el Máster de Formación al Profesoráu l'añu pasáu entamaron a trabayar per avientu o xineru porque-yos abrieron tarde la llista dexando ensin profesor a dellos institutos asturianos, lo que ye absurdo dafechu”, recuerda’l representante d’Iniciativa pol Asturianu al tiempu qu’esplica que “los d'esti añu nun van poder metese por mor de la falta d’axilidá alministrativa na especialidá d’asturianu”.

Un retrasu de “2 o 3 meses” pa la firma del papel que capacita a dar clase ye’l motivu qu’impide a estos maestros apuntase na llista, “lo que puede facer a profesionales perder opciones de trabayu” y que nun se cubran toles places demandaes polos centros educativos, dexando al alumnáu matriculáu ensin clase de Llingua Asturiana. Poro, Iniciativa pol Asturianu afala a la conseyería a axilizar los plazos.

Contador Estadistiques