Los cambios nel mou de contabilizar los casos de COVID-19 rebaxen la cifra de muertos en 14

El Ministeriu de Sanidá modificó’l mou de contabilización de los casos de COVID-19, asina como la hora d’actualización de los datos p’adaptalos al día natural. Estos cambios faen que nos númberos oficiales d’Asturies haya 14 muertos menos que nel informe últimu.

Dende'l llunes el departamentu dirixíu por Salvador Illa considera namái como casos de COVID-19 aquellos confirmaos por prueba de PCR y Elisa, nun contabilizando los positivos por test d’anticuerpos. N’Asturies hasta’l domingu había 2.369 de los primeros y 985 de los segundos.

El cambiu na notificación de datos provoca, poro, modificaciones nos indicadores d’hospitalizaciones y finaos. El domingu la Direición Xeneral de Salú Pública unvió a Madrid la esistencia de 2.328 casos que necesitaron hospitalización, que colos criterios nuevos queden reducíos a 1.088, 1.240 menos.

Nos casos d’UCI pasen de 153 a 119, 34 menos, mentes que no que respeuta a les muertes la cantidá rexistrada baxa 317 a 303 porque Asturies contaba como casos confirmaos de COVID-19 aquellos que foron positivos por test d'anticuerpos, lo que cambia agora Sanidá. Poro, les cifres oficiales pierden 14 finaos.

Diferencies ente autonomíes

Según esplica la Conseyería de Salú, Asturies informaba al ministeriu de los casos confirmaos de COVID-19 y de los sospechosos, esto ye, aquellos “con sintomatoloxía clínica” y “con PCR negativa y positivos únicamente con test d’anticuerpos o prueba Elisa”. Por esti motivu rexistraba cifres más altes d'hospitalizaciones qu’otres autonomíes, que yá facíen lo que’l ministeriu obliga agora pa toes.

Los datos últimos, correspondientes a les 23.59 hores del llunes –enantes actualizábense los datos a les 20 hores–, dexaron n’Asturies 4 positivos que coloquen el total en 2.373. Na UCI hai anguaño 19 pacientes y en planta 64, mentes que’l númberu de curaciones pasa a ser de 1.314, 251 más tres incluyir tamién les altes domiciliares a les hospitalaries.

Na semeya, prueba por PCR.