La campaña d’información de la desescalada incorpora l’asturianu a la cartelería y espera pola versión asturiana de los vídeos

‘Asturies, tas faciéndolo bien’ ye’l nome de la campaña d’información y sensibilización ciudadana de la desescalada qu’entama’l Gobiernu pa estes selmanes. La cartelería incorporó dende un primer momentu l’asturianu, anque s’espera pola versión asturiana de los vídeos, les cuñes de radio y la páxina web.

Los materiales audiovisuales van contar con torna al asturianu, según confirmó’l presidente Adrián Barbón, que colgó estos díes nes sos cuentes en redes sociales los cartelos n’asturianu. El Gobiernu invierte nesta campaña 439.000 euros cola fin de calcar nes midíes de seguranza y na responsabilidá individual de los ciudadanos p’afrontar con ésitu’l procesu de desescalada nel país, anguaño en fase 1, y evitar biltos nuevos.

La iniciativa, qu’echó a andar el sábadu, ta dividida en trés bloques. El primero usa’l lema ‘Asturies, tas faciéndolo bien’ pa reconocer el comportamientu exemplar de les asturianes y asturianos dende la declaración del estáu d’alarma, asina como pa emponderar el llabor del personal sanitariu, de servicios públicos y básicos esenciales, y de las fuercies y cuerpos de seguridá del Estáu, pudiendo lleer nos carteles ‘Asturies, fuisti un exemplu dafechu. Agora vamos siguir faciéndolo bien. La desescalada tamién ye cargu tuyu’.

El segundu repasa toles midíes de seguridá. ‘Ye taaan fácil que lo vamos facer bien’ destácase na parte superior, a la que sigui una serie de ‘midíes de seguranza por y pa tola xente’ como ‘Has llavar les manes a menudo’, ‘Has respetar la distancia de seguranza de dos metros’ o ‘Más hixene en casa’.

Completa la campaña un conxuntu de videos, cuñes de radio y testos qu’esplicarán de forma cenciella dalgunes novedaes de cada fase, calcando otra vuelta na incidencia ellevada que pueden tener les actitúes individuales sobre la salú coleutiva pa caltener n’alerta a la población pa evitar asina biltos nuevos. La campaña va llegar a autobuses urbanos d’Uviéu, Xixón, Avilés y les cuenques, amás de les llinies interurbanes, y a chigres y comercios.