“El Día de les Lletres instituyóse como una xornada de reivindicación llingüística y cultural”, recuerda García Arias

El 13 de mayu del 1980 la Diputación entamó’l primer Día de les Lletres Asturianes, que debería celebrar esti vienres la so cuarentena primer edición. Tres la so disolución pa la formación de la Xunta Xeneral, l’Academia de la Llingua Asturiana (ALLA) garró nel 1983 la organización d’una xornada “de reivindicación llingüística y cultural”, recuerda Xosé Lluis García Arias, primer presidente de la institución.

El Palaciu de Velarde, sede del Muséu de Belles Artes, acoyó esta primer celebración del Día de les Lletres Asturianes. “Nel 79 y nel 80 yá se venía falando nos ambientes esmolecíos pola cuestión llingüística de la necesidá d’entamar un Día de les Lletres, pero nun había posibilidaes. Xuan Xosé Sánchez Vicente taba de diputáu y facilitó les coses pa que se fixera la convocatoria nel mes de mayu del 80”, rellata.

Consistió “nun recital de poesía, con poetes de la época y nuevos poetes”, añade al tiempu que fai memoria y cita nomes comos de Luis Aurelio Álvarez, Florina Arias Rodríguez y Julián Burgos, ente los primeros, y Felipe Prieto, Carlos Rubiera y Miguel Ángel Rojo, ente los segundos. “Foi un eventu interesante y la xente respondió”, añade la persona que presidiría la institución que se crearía n’avientu d’esi añu y que se presentaría en xineru del 1982 cola presencia de los presidentes de les academies vasca, gallega, catalana y española: l’Academia de la Llingua Asturiana.

El Día pasaría a ser Selmana nel 1982, entovía baxo organización de la Diputación. La Facultá de Lletres acoyía’l miércoles 5 de mayu la xunta de discusión ‘¿Qué ye Lliteratura Asturiana’, cola participación de los profesores José María Martínez Cachero, José Antonio Martínez García, Miguel Ramos Corrada, Álvaro Ruiz de la Peña y Roberto González-Quevedo y y la presentación del ‘Lletres asturianes’ últimu, mentes que’l Belles Artes servía de sede’l xueves a la conferencia ‘Les fontes lliteraries de ‘La aldea perdida’’ de Sánchez Vicente y el vienres un recital asturianu con Manolo Ponteo (“asturtonada”) y Rubiera (“nueu canciu”), que se completaben con una esposición “del llibru bable” y charres en dellos institutos esos díes.

L’ALLA garra’l relevu

Cola llegada de l’autonomía, que llevó a la disolución de la Diputación y del Conseyu Rexonal nel 1982 pa la formación de la Xunta Xeneral, l’ALLA garró’l relevu de la organización del Día de les Lletres. “Yera lo natural”, esplica García Arias, qu’añade que dende’l primer momentu l’enfotu yera instituyir esta xornada como “un día de reivindicación llingüística y cultural, non políticu”.

El xueves 5 de mayu, tamién nel salón d’actos del Belles Artes, tendría llugar el primer Día de les Lletres entamáu pola institución cola celebración de la xunta estraordinaria “cola presencia de miembros de númberu, d'honor y correspondientes asina comu munchu públicu qu' enllenaba dafechu'l llocal”, rellata’l númberu 7 de ‘Lletres Asturianes’, el boletín oficial de l’ALLA. Lluis Xabel Álvarez, Manuel González ‘Asur’ y Rubiera pasaben a ser miembros nuevos de númberu.

Dende entós siguíose práuticamente la mesma estructura: una apertura de gaita o asturianada, la llectura de les actes , la toma de posesión de los miembros nuevos y unes pallabres, la respuesta del presidente a diches pallabres y un discursu colos aspeutos más reseñables y de más interés pa la sociedá asturiana, y una actuación. La sede foi camudando colos años, con xornaes nel salón de la Caxa d’Aforros d’Asturies na Escandalera o’l del de la parroquia de San Xuan, siempre n’Uviéu, hasta asentase nel Campoamor, anque un añu tamién se llevó a Xixón (Teatru Xovellanos) y otru a Avilés (Casa Cultura), amás de la edición que se tuvo que desplazar unos metros hasta’l Filarmónica por obres nel teatru uviéin.

Entrugáu pola repercusión d’aquelles primeres convocatoriaes, García Arias señala que “foi ganando puxu colos años. En prensa había años con reseñes mui bones”, llegando inclusive a espublizase’l so discursu nuna ocasión. Años más tarde, la Conseyería empezaría a programar la Selmana de les Lletres Asturianes coincidiendo col Día de les Lletres Asturianes, nun primer momentu pretendiendo marcar distancies col actu académicu, anque’l pasu del tiempu convertiría esta celebración nun complementu a la xornada entamada pola ALLA.

Analizando la buelga que dexó esta celebración, que debía tener llugar güei y que finalmente se convocó pal vienres 2 d’ochobre por cuenta la crisis sanitaria pola pandemia de COVID-19, García Arias asegura que permitió “dar prestixu a la lliteratura asturiana” y visibilizar l’asturianu “como llingua d’espresión”, rescamplando l’enfotu amosáu n’impulsar la creación musical, como demuestra la importancia que se-y concede nel actu académicu a les actuaciones dende un primer momentu.

Na semeya, anuncia del IV Día de les Letres Asturianes, el primeru entamáu pola ALLA, nel númberu 5 de 'Lletres Asturianes', el boletín oficial de la institución.