"Foi l'afirmación definitiva del asturiano como llingua lliteraria"

Carlos Rubiera escribió un artículu en 'La Hoja del Lunes' de Xixón sobre'l primer Día de les Lletres Asturianes celebráu nel 1980.

L'escritor y cantantes rellata díes depués nel desapaecíu periódicu que cubría l'ausencia del restu de diarios los llunes que "el pasau martes, dii treces de Mayu (martes y trece...), fízose n'Uvieu un recital de poesía baxo'l títulu 'Día de les Lletres Asturianes'" nel que participaron "23 poetes asturianos de güei, quienes recitaron les sos composiciones". Apunta que "taba entamau pol Departamentu Cultural de la Deputación Provincina" nel "salón de aztos del Palaciu Velarde".

Rescampla que los poetes, ente los que s'incluyía él, yeren "d'estilos bien estremaos y edaes tamién bien estremaes" y que la so convocatoria "ye un fito de por sí, pos da gayola comentar que hai tanta xenite n'esta dómina (época) plumiando en llingua asturiana". Esto "da una idea de la vitalidá de la nuestra llingua nes fasteres lliteraries, y fai camentar n'un futuro granible dequí a unos años", lo que noma "la Reñacencia de les lletres asturianes", un procesu "en marcha", "xuru y irreversible, por más que lo sientan dalgunos".

Sobre'l recital comenta que "resultó entrenteníu pos hebo muncha variación temática y estilística". Tamién calca na "uniformidá llingüística de les poesíes leyíes: ¿Nun tarín ellí pa oyilo, quienes tanto falen de la diversidá de 'los bables'?".

"Foi l'afirmación definitiva del asturiano como llingua lliteraria, y la costatada de que los escritores de anguaño tienden a la normalización llingüística por sí mesmos, en sin que naide pueda falar de artificialidá con argumentos serios", asegura Rubiera, que fina l'artículu pidiendo a la Deputación "unes perres pa emprentar un llibru antolóxicu coles poesíes leyíes". "Diva ser un bon llibru y diva ser un bon finxu pa la Reñacencia qu'entama", apunta.

Fotonoticia en 'La Nueva España'

El diariu uvieín 'La Nueva España' cubrió la primera edición d'esti eventu que nel 1983 pasaría a entamar l'Academia de la Llingua Asturiana con una fotonoticia entitulada "Poesías en bable para conmerorar el 'Día de les Lletres Asturianes". "Un grupo de diverso y numeroso de poetas en bable participaron ayer en un recital conmemorativo del 'Día de les Lletres Asturianes' que, organizado por la Comisión de Cultura de la Diputación, se celebró en Museo Provincial de Bellas Artes, a partir de las ocho de la tarde.".

Darréu apunta que "como complemento a esta conmemoración, hoy, a la misma hora y en el mismo lugar, Sara Suárez Solís presentará su obra 'Camino con retorno'".

Na semeya, viñeta qu'encabeza l'artículu de Rubiera en 'La Hoja del Lunes' de Xixón del 19 de mayu del 1980.