“‘La cereza’l cielu’ ye un discu mui variáu n'estilos y instrumentación”, apunta la banda folk Cerezal

“No musical caltién la llinia del anterior trabayu, con un base folk amestada con otros estilos, como pue ser el pop principalmente, pero nesti casu quiximos ampliar l’abanicu sonoru gracies a la entrada de miembros nuevos al grupu”. Cerezal rellata nesti videu p’Asturies.com 'Cómo se fizo ‘La cereza’l cielu’', el so trabayu últimu.

El cantante Marcos Álvarez, el violinista Gonzalo Pumares y el guitarrista Juan Yagüe, xunto col pintor Miguel G. Díaz, responsable de llibretu, espliquen nesta pieza audiovisual fecha pola banda’l procesu creativu del so segundu trabayu, tres el debú nel 2014 con ‘Camín’. Un álbum con 13 pieces que cuenta con collaboraciones “d’una montonera de collacios que punxeron el so granín d’arena”, como ye’l casu Juan Duarte y Ruboh (voces), Nel Suárez (guitarra acústica), Álvaro Bárcena (guitarra llétrica, dobro y steel guitar), Fernando Oyagüez (banjo), José Manuel Tejedor (gaita), Rodrigo Joglar (acordión), Xurde Fernández (whistle), Pedro Santiago (bodrhan), Javi Tejedor (acordión), Marco A. Guardado (percusión), Rubén Alba (gaita) y David Mori (xiblata).

“Ye un saltu p’alantre non sólo en términos estilísticos o sonoros, que tamién, sinón un saltu p’alantre de la psicoloxía d’un grupu de persones que s’axunte pa crear daqué que nun esiste”, apunten, pa rescamplar que ‘La cereza’l cielu’ ye un trabayu “mui variáu n'estilos y instrumentación” que “no musical caltién la llinia del anterior trabayu, con un base folk amestada con otros estilos, como pue ser el pop principalmente, pero nesti casu quiximos ampliar l’abanicu sonoru gracies a la entrada de miembros nuevos al grupu”. Al empar Cerezal cuida nesti discu, siguiendo la filosofía cola que nació’l grupu, los testos, que beben “de fontes lliteraries dientro’l trabayu creativu qu’hai n’Asturies”, con presencia d’escritos de Miguel Monteavaro, Xurde Fernández, el Padre Galo o Humberto Gonzali.