El Gobiernu aprueba una partida de 4 millones pa les ayudes de 400 euros a autónomos pal pagu de gastos fixos

El Conseyu de Gobiernu dio esti miércoles el preste a una partida de 4 millones d'euros p'ayudes direutes pa cumplir con una de les diez midíes estraordinaries p’amenorgar los efeutos económicos y sociales por cuenta la pandemia de COVID-19 aprobaes el 26 de marzu. Estes subvenciones individuales son de 400 euros.

L’oxetivu ye sofitar a los autónomos pal pagu de los gastos fixos que deben afrontar a pesar de tener atrancaos los sos negocios por cuenta les restricciones afitaes pol estáu d’alarma. Concretamente van dirixíes a cubrir alquileres de llocales o cuotes hipotecaries, cuotes mínimes de suministros de lletricidá, combustibles, agua, telefonía y conexón a Internet, seguridá, gastos d’asesoría fiscal y contable, seguros, publicidá y redes sociales, gastos financieros y adquisición y caltenimientu de software, ente otros conceptos.

El Gobiernu calcula qu’unes 10.000 persones cumplen colos requisitios p’acceder a estes ayudes direutes, a la que destina 4 millones d’euros. Pa optar a la subvención de 400 euros será necesario tener nel exerciciu 2019 un rendimientu netu reducíu de les actividades económicas declaraes igual o inferior a 30.000 euros.

El plazu de presentación de solicitúes será d’un mes dende’l día siguiente hábil al de l’espublización del decretu de convocatoria nel Boletín Oficial del Principáu d’Asturies (BOPA), que correspuende col llunes. Otra manera, el Gobiernu aprobó güei un decretu que posibilita l’aplazamientu y fraicionamientu, por un plazu máximo de 6 meses y ensin intereses, de les deudes tributaries de trabayadores autónomos, pymes y microempreses que se vieron obiglaos a paralizar la so actividá, midida qu’afeuta a aquelles deudas que venzan enantes del 1 de xunu y que s’estiende a tolos impuestos que xestiona Asturies, tanto los cedíos como los propios y los llocales.

Semeya obra d'Armando Álvarez.