Asturies baxa del mediu centenar de casos positivos nuevos por COVID-19

Los datos oficiales últimos sobre la COVID-19 n’Asturies reflexen una posible baxada de la curva, como vienen reconociendo les autoridaes y apuntando espertos. El xueves el númberu de positivos nuevos tornó a baxar del mediu centenar; en concreto 49 casos, mesma cifra que’l 17 y el 22 de marzu, pa poner el total en 1.433.

Dende esta última fecha los positivos superaron siempre esta cantidá, la menor rexistrada dende que, col estáu d’alarma, el Ministeriu de Sanidá centralizase los recopilación de datos, el 16 de marzu. Inclusive en dos xornaes pasáronse del centenar, con 117 como récor el día 24 cola esceición de los 147 del día 20 tres conocese’l casu de los xeriátricos.

El martes rexistráronse 82 positivos nuevos, el miércoles 62 y ayeri 49, datos que paecen confirmar una baxada de la curva, como se pue ver nesta gráfica que toma como referencia los modelos d'epidemies de Verhulst y Gompertz. Éstos, axustaos por mínimos cuadraos a los datos del Serviciu de Salú del Principáu d'Asturies (SESPA), predicen la fin de casos nuevos pa últimos d'abril y mediaos de mayu, de manera respeutiva.

Un fináu esti xueves

Ayeri hebo que llamentar un fináu, siendo’l total por cuenta la COVID-19 de 70. Na UCI hai anguaño 82 paciente, 6 más que’l miércoles, y en planta 329, lo que significa un aumentu de 20 persones.

No que respeuta a curaos, hebo 19, asitiando’l total en 154. Otra manera, el llaboratoriu de Microbioloxía del Hospital Universitariu Central d’Asturies (HUCA) lleva feches 13.385 muestres pa determinación de la COVID-19 por PCR.