TPA va emitir un espaciu educativu d’una hora con güecu pal asturianu

Educastur TV va ufrir conteníos al alumnáu en castellanu y asturianu mientres la suspensión de l’actividá llectiva presencial pol estáu d’alarma pola pandemia de coronavirus SARS-CoV-2. Va emitise nel espaciu ‘Aprende con TPA’ de llunes a viernes, de 10.30 a 11:30 hores na canal A7, y una hora más tarde na A8.

La Conseyería d’Educación impulsa esti programa educativu, en collaboración cola Radiotelevisión Pública del Principáu d’Asturies (RTPA), que tien l’oxetivu de “ufrir conteníos y recursos al alumnáu, amosar les práutiques inspiradores y el compromisu de la comunidá docente, y facer parte a les families nel procesu de formación mientres la suspensión de l’actividá llectiva presencial”. Educastur TV naz como un mediu d’accesu universal con actividades a disposición de tol alumnáu.

Nel proyeutu participen un total de 20 docentes de toda Asturies, que van poner un conteníu que permiter desarrollar competencies y capacidaes adaptaes a les diferentes etapas educativas: Infantil, Primaria y Secundaria. Les actividaes propuestes básense en metodoloxíes d’investigación, retos y nel fomentu de la creación artística, con espaciu pa la llingua y cultura asturiana.

Súmase a l’espaciu web ‘Educastur 24x7’

La iniciativa Educastur TV súmase a otres entamaes pola Conseyería d’Educación énte la crisis sanitaria, como l’espaciu web ‘Educastur 24x7’, que proporciona recursos al alumnáu, asina como formación, acompañamientu y sofitu a la comunidá docente y a les direiciones de los centros educativos para dar continuidá al procesu d’enseñu y deprendizaxe con actividaes non presenciales.

Semeya obra d'Enrique G. Cárdenas baxo llicencia CC BY 3.0.