Les llingües del mundu y de la Península, y el vocabulariu de la cocina protagonizaron el primer capítulu d’Educastur TV en TPA

Inaciu Galán, profesor voluntariu responsable de los conteníos de Llingua Asturiana n’Educastur TV, dedicó'l so espaciu del primer capítulu a falar de les llingües del mundu y de la Península Ibérica, y del pallabreru de la cocina. TPA emite esta iniciativa nel espaciu ‘Aprende con TPA’ de llunes a viernes a les 10.30 hores.

Esta mañana estrenóse Educastur TV con cuatro estayes, la última d’elles dedicada a l’asturianu. Galán, dende’l so llar, principió con una esplicación destinada a escolinos de 12 a 18 años sobre les llingües qu’hai nel mundu, pa depués centrase nes peninsulares apoyáu nun gráficu con un mapa nel que se víen tolos dominios llingüísticos.

Darréu desplazóse a la cocina, onde esplicó’l vocabulariu típicu d’esti llugar de la casa y los preseos habituales. La cuyar, el cuchiellu, la vasa, el sartén, la pota, la garciella, el mandil o’l rodiyu foi dalgunos de los elementos que foi mostrando y esplicando con munchu humor.

Pa finar, Galán mandó la xera voluntaria a los escolinos d’esplicar nun videu la cacía de la so casa y punxo un exemplu musical y un refrán, dalgo que va facer en tolos programes. Nesti primeru presentó’l cantar ‘La mesma revolución’ de Silvia Quesada y el dichu, mui afayadizu cola temática del día, ‘Púdote más el güeyu que’l butiellu’.

‘Aprende con TPA’ va emitise de llunes a vienres, de 10.30 a 11.30 hores na canal A7 y, una hora más tarde, na A8. El siguiente espaciu dedicáu a la Llingua Asturiana va centrase “nes llingües d’Asturies”, adelantó’ maestru, que colgó na rede otres xeres de la clase númberu 1.