Nun va haber Vuelta a Asturies nel 2020

El Club Ciclista Aramo anunció la suspensión de la LXIII Vuelta a Asturies-Julio Álvarez Mendo, que diba salir d’Uviéu’l 1 de mayu con trés etapes previstes. L’escenariu actual por cuenta la pandemia de COVID-19 obliga a dar esti pasu y pensar na edición del 2021 por mor de la falta de feches pa un aplazamientu de la carrera.

“La prioridá agora ye garantizar la salú de toles personas y nes condiciones actuales nun podemos siguir alantre cola organización de la prueba”, argumenta Cristina Álvarez Mendo. La direutora de la carrera ciclista comunicó ayeri al Gobiernu, conceyos y patrocinadores esta decisión, que venía meditando nes selmanes últimes.

La falta de feches nel calendariu UCI imposibilita l’aplazamientu de la carrera, como deseaben munchos aficionaos. Les grandes vueltes, como’l Giro, que diba salir el 9 de mayu de Budapest, van tener preferencia pa recolocar les sos pruebes, a la espera de lo qu’asocede col Tour (27 de xunu-19 de xunetu), últimu gran acontecimientu deportivu mundial que se caltién xunto con Wimbledon (29 de xunu-12 de xunetu).

Los peores datos de COVID-19 a nivel estatal

Dende qu’entamó la pandemia de coronavirus SARS-CoV-2 nun se rexistraron a nivel estatal peores númberos qu’ayeri. A les 20 hores rexistráronse 9.222 contaxos y 849 finaos nun únicu día, pa poner los totales en 94.417 y 8.189, de manera respeutiva.

N’Asturies les cifres son asemeyaes a los de díes anteriores. La casos nuevos foron 78, asitiando’l total en 1.236, con 6 muertes más pa llegar a les 55.

Na UCI hai 61 pacientes, 4 más que’l domingu, y en planta 306, lo que supón un aumentu de 25. Mentes, curáronse 12 persones que se sumen a les 78 que lo fixeron previamente.

Na imaxe, Álvarez Mendo fala col ex ciclista Alberto Contador y l'alcalde de Cangas, José Víctor Rodríguez, mientres el pasu de La Vuelta'l setiembre pasáu per L'Acebu. Semeya propiedá de la 'Vuelta a Asturias-Julio Álvarez Mendo'.