L'aumentu de positivos caltién el ritmu: 50 por 49 del día anterior

El númberu total de casos queda en 292.

L'actualización última de datos del Ministeriu de Sanidá, que correspuenden a les cifres de les 20 hores d'ayeri, confirma un aumentu de númberu de casos d'un mediu centenar diarios nesti momentu de la pandemia de COVID-19. Si'l martes hebo 49 positivos más, esti miércoles foron 50 xustos.

D'ellos, cuatro recibieron l'alta, ún morrió y seis tán na UCI, ún más que'l día anterior. Si miramos los datos del conxuntu del Estáu, la cifra total ye de 17.147, 3.431 más que'l martes, siendo la Comunidad de Madrid, con 6.777 casos, la más afeutada.

Na imaxe, l'Hospital Universitariu Central d'Asturies (HUCA). Semeya obra de LMLM baxo llicencia CC BY-SA 4.0.