El númberu positivos aumenta en 49 en 24 hores y queda en 242

Col estáu d'alarma ye agora'l Ministeriu de Sanidá'l que fai públicos los datos d'Asturies.

A les 20 hores d'ayeri había nel país 242 casos positivos de COVID-19. El llunes de tarde yeren 193, cuatro más que na cifra última dada pola Conseyería de Salú tres el cambiu nel mou de comunicación de los datos asturianos pola entrada del estáu d'alarma, dándose agora una única actualización diaria dende Madrid.

Asina, en 24 hores hebo 49 persones más afeutaes pola enfermedá causada pol coronavirus SARS-CoV-2. De los 242 casos namái finó en muerte ún, con 4 curaciones y 5 pacientes ingresaos nestos momentos na UCI.

Más del 13.000 nel Estáu

Nel conxuntu del Estáu, hai 13.716 positivos, con 598 muertos, siendo la Comunidad de Madrid el focu principal con 5.637 casos. N'Europa hai confirmaos 74.399 y nel mundu, 188.976, según los datos que manexa'l Ministeriu de Sanidá.