Los sindicatos educativos demanden al Gobiernu “firmeza y determinación” énte la posición “incomprensible” de Celaá

"Nel actual marcu llegal pue solucionase la situación precaria que vive’l profesoráu d’asturianu", afirma Marta Mori, secretaria de Llingua Asturiana y Gallego-asturiano de CC OO Enseñanza. Xosé Lluis Colodrón, de SUATEA, critica "la postura blanda" del Gobiernu y la "descoordinación" esistente ente Educación y Política Llingüística.

"Ye incomprensible porque pa la oficialidá, si too fora bien –porque ye un trámite complexu y con dificultaes por tener que pasar per un filtru parllamentariu–, pasaríen años y la situación precaria del profesoráu d’asturianu nun pue esperar", asegura Mori, que recuerda que "nel marcu actual marcu llegal pue solucionase". "Namái ye necesario modificar los dos reales decretos de Primaria y Secundaria. Ye un trámite alministrativu cenciellu", añade.

Pero amás de incomprensible considera que la posición de María Isabel Celaá "ye irresponsable, más viniendo d’un representante socialista, pola situación na que tán toes eses persones". Por ello, demanda al Gobiernu asturianu, tamién socialista, "firmeza y determinación" y que s’aprovechen les Conferencies Sectoriales d’Educación pa insistir sobre la especialidá docente de Llingua Asturiana y Gallego-asturiano, mentes que CO OO Enseñanza va treslladar una vegada más al Ministeriu d’Educación y Formación Profesional esta demanda sobre la que’l Conseyu Escolar del Estáu posicionóse a favor en delles ocasiones.

Tamién esixe "firmeza" al Executivu asturianu’l Sindicatu Unitariu y Autónomu de Trabayadores de la Enseñanza d’Asturies (SUATEA). "La postura amosada pola conseyera d’Educación ye blanda. Hai una falta de compromisu y de descoordinación, porque Política Llingüística debería de presionar tamién sobre l’asuntu", afirma Colodrón, responsable de la Secretaría de Llingua de SUATEA.

Amás considera que "tán confundiendo asuntos. La especialidá docente nun tien nada que ver cola oficialidá. L'inglés nun ye oficial y tien especialidá", recuerda. Por eso nun entiende la postura "inmovilista" al respeuto de Celaá y de la conseyera que provoca que "el profesoráu siga como interín, con medies xornaes y itinerante, con desplazamientos continuos".

Sobre la posición amosada ayeri pola vocera del Executivu, Melania Álvarez, tres el Conseyu Gobiernu, Colodrón apunta que ye la que SUATEA vien demandando, polo qu’espera que s’abandones les "postures febles" y haya una presión real en Madrid pa la modificación de los reales decretos pa la creación de la especialidá docente de Llingua Asturiana y Gallego-asturiano.

Na semeya, Carmen Suárez, conseyera d'Educación, y Celaá tres la xunta celebrada'l miércoles en Madrid.