Día del Llibru Asturianu

El Gobiernu considera “irrenunciable” la especialidá y apunta que “nun ye necesario esperar a la oficialidá”

|
Melania Álvarez y Enrique Fernández Conseyu de Gobiernu especialidá

La vocera del Gobiernu, Melania Álvarez, salió esti xueves al pasu énte la postura amosada’l día anterior pola ministra d’Educación y Formación Profesional, María Isabel Celaá. Aseguró que la creación de la especialidá docente “ye una midida irrenunciable” y que “nun ye necesario esperar a la oficialidá p’atender la reivindicación”.

Esta cuestión foi ún de los temes trataos pol Conseyu de Gobiernu na xunta d’esta mañana, según apuntó Álvarez. La tamién conseyera de Derechos Sociales y Bienestar comentó que la responsable d’Educación, Carmen Suárez, “fixo-y entrega a la ministra ayeri mesmu de los documentos que soliciten la creación de la especialidá mediante la modificación de los correspondientes decretos”.

“Ye un interés qu’Asturies lleva espresando al menos una década y qu’esti Gobiernu defende y va defender pa que la especialidá sía al fin una realidá qu’ampare al nuesu personal docente”, aseguró. Enantes recordara que “nun ye necesario esperar a la oficialidá p’atender la reivindicación”.

Esta respuesta del Gobiernu llega tres la posición amosada ayeri pola ministra d’Educación y Formación Profesional na xunta con Suárez, optando por esperar una declaración d’oficialidá anguaño imposible pola falta d’un votu pa sumar los trés quintos de la Xunta Xeneral qu’afita l’Estatutu d’Autonomía pa la so reforma y les postures que caltienen los partíos políticos contrarios al respeuto.

Na imaxe, Álvarez xunto con Enrique Fernández, conseyeru d'Industria, Emplegu y Promoción Económica, na rueda de prensa tres el Conseyu de Gobiernu. Semeya obra d'Armando Álvarez.

Contador Estadistiques